E fundit!

09:42 Aktualitet

Masat për sezonin veror/ Lamallari: Siguri më e lartë në destinacionet turistike

U prezantuan sot masat e marra nga Policia e Shtetit për g...

Drejtoresha të reja, politika të vjetra/ Nga Artan Hoxha

25 Shtator 2016, 17:14, Aktualitet CNA

Ecuria e të ardhurave bazë fiskale 2016, ato nga tatimet dhe doganat, iu përafrua muaj pas muaji ecurisë problematike të vitit 2015.

Pas një ecurie rrejshëm pozitive ne tre muajt e pare te vitit, fenomeni dha shenjat e para ne prill-maj 2016 (shih: http://www.syri.net/2016/06/28/iluzion-fiskal-rilindes-2016-nga-artan-hoxha), u qartësua në qershor-korrik 2016 (shih: http://www.syri.net/2016/08/19/rreshqitje-teposhte-fiskale-2016-nga-artan-hoxha) dhe u vërtetua nga të dhënat e muajit gusht 2016.

Në tabelën në fund të shkrimit shihet qartë rënia relative e të ardhurave mujore dhe progresive në raport me planin 2016 dhe faktin 2015, e që ka arritur në atë pike sa, të ardhurat faktike të gushtit 2016 janë praktikisht të barabarta me ato të gushtit 2015 si dhe, më të ulta se plani origjinal 2016, qoftë ai mujor e qoftë ai progresiv. Diferenca ende pozitive mes të ardhurave progresive 2016 kundrejt atyre 2015 është veçse iluzion fiskal shkaktuar nga anomalitë rastësore në muajt e parë të vitit.

Me gjasa, rezultati për katër muajt e mbetur të vitit 2016 do të jetë aty-aty me muajt respektivë të 2015-tës, në mos me keq, duke projektuar një vit fiskal 2016, në tërësinë e vet, po aq problematik sa ai 2015.

E ndërgjegjshme për këtë projeksion, që në fillim të vitit e në vijim Rilindja shkurtoi shpenzimet, qoftë në raport me planin 2016 e qoftë në raport me faktin 2015 e ku, zëri më i masakruar është ai i investimeve publike.

Gjithashtu, me akt normativ veror, Rilindja ndryshoi me ulje planin e të ardhurave për muajt e mbetur të vitit e, së fundmi, ndryshoi edhe dy drejtoreshat e përgjithshme, atë të tatimeve dhe atë të doganave.

Emërimi i dy drejtoreshave të reja, profesionalizmi i të cilave është provuar me kohë, ndonëse vlen të përgezohet, është akt i pamjaftueshëm. Duhet ndërruar politika fiskale.

Pa këtë do të ishte njësoj sikur të shpresonim ecje më të shpejte pas ndërrimit të kuajve, sado te fuqishëm qofshin, pa ndrequr rrotat e thyera të karrocës.

Gjithashtu, karrocieri duhet të kthejë vëmendjen tek drejtimi i karrocës në rrugën me gropa e te heqë dore nga hallakatjet e shumta që i ka fort për zemer, si p.sh., festivali i zërit më të mire mes rilindësve të rinj.