Katastrofë në Detin Mesdhe: Organizata "Mjekë pa kufij" nuk sheh shanse për shpëtim

6 Gusht 2015, 19:30, Kosova & Bota CNA

Sërish tragjedi në Mesdhe. Një anije refugjatësh përmbyset para brigjeve të Libisë. Qindra refugjatë duket se kanë humbur jetën. Florian Westphal nga “Mjekët pa kufi” ka qenë pjesë e misionit të shpëtimit në Mesdhe.

DW: Zoti Westphal para brigjeve të Libisë duket se janë mbytur qindra refugjatë kur anija e tyre u përmbys. Anijet e ndihmës së “Mjekëve pa kufi” ka qenë në afërsi. A mundët të shpëtonit njerëz?

Florian Westphal: Njëra nga anijet tona, Dignity 1 shkoi në vendin e katastrofës dhe mundi të nxirrte disa refugjatë nga ujërat. Por nuk mund të themi me saktësi se sa njerëz kanë lënë jetën aty. 700 vetë duket se kanë qenë të bordin e anijes së përmbysur. Duhet të përgatitemi për skenarin më të keq.

DW: A mundeni ju të ndihmoni në anijet e refugjatëve? Keni aparate mjekësore në Dignity 1?

Po, kemi si personel mjekësor ashtu edhe pajisje në bordin e anijes, nga ato që së paku na mundësojnë të japin ndihmën e parë. Shumë nga refugjatët janë gati të dehidruar, kanë etje të madhe, sepse kanë ndenjur për orë të tëra në gomone pa pirë ujë. Ne mundemi të fillojmë menjëherë të japim ndihmën për të kapërcyer traumën e kalimit të Mesdheut. Por sigurisht refugjatët me probleme më të rënda mjekësore duhet t’i dërgojmë në spitale. Por sa mundemi ndihmojmë në bord.

DW: Sa anije keni në dispozicion?

Ne nga organizata “Mjekët pa kufi” kemi dy anije në mision në Mesdhe. Në një anije të tretë ne punojmë bashkë me organizatën joqeveritare nga Malta “Migrant Offshore Aid Station”.

DW: A mund të arrinit diçka me këtë punë?

Që nga fillimi i majit ne mund të shpëtonim rreth 10.000 vetë në Detin Mesdhe apo i kemi marrë nga gomonet e tyre, për t’i dërguar të sigurtë në Itali.

DW: Por çfarë ndodh aty? Mund të kujdeseni për refugjatët më tej apo ia lini këtë autoriteteve italiane?

Në Itali sigurisht janë autoritetet italiane ato që e kanë përgjegjësinë kyresore, pra që këta njerëz të marrin kujdesin e duhur. Por ne jemi aktivë edhe aty dhe kujdesemi që refugjatët të marrin ndihmën mjekësore, sidomos në qendrën mjekësore të pranimit në Pozallo në Sicili. Ne kujdesemi për refugjatët që stacionohen në Sicili edhe nga ana psikologjike. Nuk duhet harruar që këta njerëz nuk janë vetëm të traumatizuar nga kushtet në vendin e tyre, por edhe nga peripecitë e udhëtimit: me kapitullin e fundit tragjik dhe shumë të rrezikshëm të kalimit të Detit Mesdhe.

DW: Si mendoni ju, çfarë duhet të ndryshojë në Europë në mënyrë që anija si Dignity 1 e anije të tjera të mos nevojiten më në Mesdhe?

BE dhe vendet anëtare, ndër to edhe Gjermania duhet qartësisht të ndryshojnë politikën e tyre. Ata duhet t’ua mundësojnë njerëzve që janë në arrati të vijnë në mënyrë legale dhe të sigurtë në BE për të siguruar azil. Kjo do t’u hiqte kontrabandistëve mundësitë e përfitimit. Rasti i tanishëm në Mesdhe provon edhe njëherë që politika e Bashkimit Europian ka çuar aty që njerëzit të ndërmarrin një udhëtim të tillë të çmendur me kaq rreziqe. Kjo politikë ua bën të pamunudr njerëzve të hyjnë në mënyrë legale e të sigurtë në Europë. Shumica prej refugjatëve duhet të rrezikojnë jetën për të hyrë në BE, sepse nuk kanë rrugë të tjetër. DW

Florian Westphal është drejtor i seksionit gjerman të organizatës humanitare “Mjekë pa kufi.”