Çokollata, kënaqësi dhe pasion

18 Janar 2015, 15:57, Lifestyle CNA

Ajo, çka nuk do të refuzonim dot, është ëmbëlsira dhe janë pikërisht çokollatat ato që na tundojnë më fort. Qoftë çokollatë e bardhë, e zezë me fruta apo jo, nuk ka rëndësi. Përveç shijes së parezistueshme, secila prej tyre ka disa ndikime befasuese në shëndetin e njeriut.

Pothuajse, gjatë gjithë periudhës së Mesopotamisë, çokollata përdorej si pije. Në nëntor të 2007-ës, arkeologët raportuan gjetjet e kultivimeve më të hershme të kakaos, të cilat datojnë rreth vitit 1100 deri 1400 p.l.k, në Puerto Escondido, Honduras.

Majat e kultivonin kakaon në kopshtet e tyre dhe e përdornin për të prodhuar një pije me shije të hidhur, e cila përdorej vetëm me raste të veçanta. Ndërsa në Evropë ajo u paraqit për herë të parë nga Montezuma dhe filloi të pihej, kryesisht, pas vaktit të drekës. Për vite të tëra, prodhimi i çokollatës nuk ndryshoi, derisa erdhi periudha e revolucionit industrial, që i dha çokollatës formën që ajo ka edhe sot.

Ekzistojnë lloje të ndryshme të çokollatës. Ajo me qumësht është një gërshetim midis kakaos, qumështit të freskët apo atij pluhur dhe sheqerit. Çokollata përmban alkaloidë, të cilat kanë disa ndikime psikologjike te njerëzit, ndërsa çokollata e zezë përmendet shumë për ndikimet pozitive, që ka në shëndetin e gjithsecilit, pasi përmban antioksidantë, të cilat zvogëlojnë formimin e radikaleve të lira. Çokollata e bardhë nuk ka në përmbajtje të saj aspak kakao, por vetëm gjalpë kakaoje, qumësht dhe sheqer, ndërsa ajo e zezë ka sasi të mëdha yndyre. Çokollata, e cila nuk ka fare sheqer është, thjesht, liker çokollate dhe ka shije të hidhur.

Çfarë ndikimesh kanë çokollatat në shëndetin e njeriut?
Çokollata është një prej kënaqësive më të mëdha në jetë dhe si e tillë shijohet shumë, por ajo ndikon edhe shumë pozitivisht te shëndeti i njeriut. Çokollata e zezë ndikon pozitivisht në rrugët e frymëmarrjes, lufton kancerin, stimulon trurin, parandalon kollën, ndërsa ndikimi afrodiziak nuk është provuar ende.

Sipas kërkimeve të fundit, ngrënia e sasive të caktuara të çokollatës ndihmon në luftimin e sëmundjeve të ndryshme, por duhet pasur shumë kujdes, kur bëhet fjalë për sasinë, sepse ngrënia e tepërt, çon në rritje të kolesterolit. Shkrirja e çokollatës në gojë ndikon në rritjen e veprimtarisë së trurit.