web counter
LEXO PA REKLAMA!

SHKARKO APP

App Store
Google Play

Tirana “shkelmon” krizën, 3 gola në derbi. “Fundoset” Partizani

3 Tetor 2025, 20:52, Sport CNA

Tirana “shkelmon” krizën, 3 gola në derbi.

Tirana i ka dhënë fund krizës se rezultateve negative. Bardheblutë triumfuan 3-0 në derbin ndaj Partizanit, në një ndeshje pa shumë histori.

Sukses i rëndësishëm për 26 herë kampionët e vendit, që kalojnë krizën te rivalët e kryeqytetit.

Sfida nisi e qetë nga të dyja ekipet, që në minutat e para u kujdesën për të mos pësuar. Megjithatë baraspesha zgjati deri në minutën e 19-të. Falaye përfitoi nga një top i marrë në zonë dhe i harruar nga mbrojtja e Partizanit e ndali topin në rrjetë, duke i dhënë avantazhin Tiranës.

Pavarësisht epërsisë, bardheblutë nuk i ndalën sulmet. Në minutën e 30-të, Patatsia fitoi penallti, pas një ndërhyrje të gabuar të Albion Markut në zonë.

Ekzekutimin e 11 metërshit e mori përsipër vetë gjeorgjiani, i cili u tregua i saktë dhe dyfishoi shifrat për ekipin e Roberto Bordin.

Trajneri i Partizanit provoi me disa lëvizje në formacion, por nuk dhanë efekt në fushë. Goditjen përfundimtare të kuqve ua dha Tabeku. Sulmuesi lëvizi bukur në zonë dhe me një gjuajtje të shkëlqyer e ndali topin në fundin e rrjetës.

Me avantazhin 3-0, Tirana nuk e kishte të vështirë për të menaxhauar fitoren. Bardheblutë shijojnë fitoren e parë sezonale dhe ngjiten në vendin e tetë me pesë pikë, një më shumë se Partizani, që zbret në vendin e parafundit dhe konfirmon krizën.

Për “demat” kjo është humbja e katërt radhazi dhe mund t’i kushtojë stolin trajnerin Milinkoviç.





Lajmet e fundit nga