E fundit!

14:29 Aktualitet

VIDEO-“Flamur ngrihu në këmbë”/ Ulsi Manja dirigjon opozitën: 1,2,3,4, vazhdoni

Debati i deputetit socialist dhe kryetarit të Komisionit t...

Tetova shpërthen ndaj arbitrimit: Ja ku i kemi pretendimet

23 Gusht 2025, 13:46, Sport CNA

Vllaznia triumfoi ndaj Egnatias me rezultatin 2-0 në ndeshjen hapëse të Superiores, në një përballje ku nuk munguan polemikat.

Te rrogozhinasit kanë pretendimet për arbitrimin, i cili sipas tyre, veproi me standarde të dyfishta.

Pas ndeshjes, trajneri i Egnatias, Edlir Tetova, u shpreh se arbitri kishte ndikim shumë të çuditshëm. Pretendimet janë për kartonin e kuq dhe penalltinë.

"Ishte një ndeshje shumë e bukur në fushë, por kishte një ndikim shumë të çuditshëm të arbitrimit që në ndeshjen e parë. Pretendimet janë te kartoni i kuq, pretendimet janë te penalltia, nëse ka kontakt me trup minuta e 46-të kur u shkel pas Xhemajli atëherë është penallti. Ta shohë edhe VAR-i e mos ta japë, ne kemi ekranin tonë në pankinë dhe është shumë e çuditshme. Pastaj lojtari i Vllaznisë i tërheq fanellën dhe ai çuditërisht i jep faull të kundërt dhe e ndëshkon me karton të verdhë.”

Në krahun tjetër, drejtori sportiv i Vllaznisë, Vioresin Sinani, u shfaq shumë i lumtur, ndërsa theksoi se fitoi skuadra më e mirë në fushë.

"Kundër një kundërshtari shumë të fortë besoj që u bë një ndeshje e bukur edhe për publikun. Mendoj që fitoi skuadra më e mirë dhe shpresoj të vazhdojmë kështu. Sa u takon pretendimeve mendoj që kartoni i kuq ndaj trajnerit tonë nuk duhej të ishte, sa i përket penalltisë mendoj që duhet ta shoh sërish.

Trajneri për mua është i respektuar dhe mendoj që Vllaznia mori fitoren e merituar. Përforcimet e reja, janë të gjithë të vlefshëm.”

Për autorin e golit të dytë, Melos Bajrami, fitorja ndaj Egnatias i jep shtysë për të ardhmen Vllaznisë, që këtë sezon synon titullin kampion.

"E rëndësishme është të fitojë ekipi. Jam i lumtur dhe që ndihmova ekipin si në Europë edhe këtu. Çdo fitore është e rëndësishme, por kur niset kampionati në këtë mënyrë është si një start i mirë. Konkurrenca e bën më të mirë ekipin dhe në çdo ekip duhet. Ishim të motivuar për të fituar edhe për trajnerin, edhe për tifozët."

Në javën e dytë, Vllaznia sfidon Dinamon në transfertë, ndërsa Egnatia pret Elbasanin në Rrogozhinë.