Ndahet nga jeta Albano Vaso, figura e dashur e futbollit korçar

28 Qershor 2025, 12:46, Sport Iris Rezhda

Një humbje e madhe ka goditur komunitetin sportiv të Korçës. Albano Vaso, ish-futbollist i Skënderbeut dhe një nga figurat më të dashura të qytetit, është ndarë nga jeta, duke lënë pas një boshllëk të thellë në zemrat e atyre që e njohën.

Albano ishte djali i legjendës së futbollit korçar, Teodor Vaso, por mbi të gjitha ishte një njeri i rrallë, që fitoi respektin e të gjithëve përmes karakterit të tij të qetë, përkushtimit dhe dashurisë për sportin. Largimi i tij i parakohshëm ka prekur thellë jo vetëm familjen dhe miqtë, por edhe të gjithë komunitetin sportiv e qytetar.

Ish-trajneri Dhimitraq Xhambazi e kujton si një djalë shembullor, me sjellje të përsosur dhe të dashur me të gjithë. Dhimbja për trajnerin është akoma më e madhe pasi një vit më parë u nda jeta edhe babai i Albanos, legjenda e futbollit Teodor Vaso.

"Albano Vason e kam njohur shumë herët sepse e kam pasur pjesëtar të ekipit të para të rinjve dhe të rinjve. Albano, një djalë i mirë, shembullor, në të gjitha drejtimet, aq më tepër që vjen nga një familje futbollistësh si i ndjeri Todo Vaso që sot ndiej edhe më shumë keqardhje për të dy këta njerëz shumë të mirë të qytetit. Një futbollist që ishte me të dhëna, jo vetëm me ekipin e para të rinjve, por ai është aktivizuar edhe me ekipin e të rinjve. Ajo që dua të veçoj në drejtim të këtij djali kaq të mirë është që ai ka pasur një shoqëri dhe shokët e deshën shumë. Ishte shumë njeri i dashur me të tjerët, ishte një njeri që nuk të krijonte asnjë shqetësim. Vdekja e parakohshme, duke u bashkuar edhe me vdekjen e të atit para 1 viti, mendoj që është akoma më e rëndë dhe e ndiejmë vërtet këtë humbje, jo vetëm ne që kemi jetuar e punuar me të, por edhe sportdashësit korçarë sepse ai e meritonte për të qenë një njeri shumë i mirë. Vdekja e tij e parakohshme është një keqardhje e madhe, aq më tepër që unë kam edhe lidhje familjare, më ka ardhur shumë keq për këtë njeri të dashur të qytetit të Korçës", u shpreh Xhambazi.

Largimi i tij i parakohshëm ka prekur jo vetëm ata që punuan dhe luajtën përkrah tij, por gjithë qytetin që e njohu si një bir të denjë të Korçës. Renato Rapo, i cili ka luajtur në ekip me të, ndalet te thjeshtësia dhe energjia pozitive që Albano sillte në çdo moment.

"Bëhet fjalë për një djalë të qeshur, një djalë gazmor, djalë i kompletuar. E rëndësishmja, vjen nga një familje me emër në qytetin e Korçës. Është një humbje shumë e madhe për të gjithë ne, bashkëfutbollistët, komunitetin dhe në veçanti familjen. Kam luajtur me të në vitet 1980, konkretisht nga 1985 deri në vitet 1992-1993, ishim bashkë në ekipin e Skënderbeut. Ai erdhi pas meje, se unë jam pak më i madh në moshë nga Albano. Pavarësisht ishte djali i Todo Vasos, ai nuk donte të njihej ashtu, e kishte si siklet atë pjesë. Me shoqërinë dhe brenda ekipit ishte djalë i humorit, pranonte dhe shaka dhe vërejtje. U shpreh ngushëllimet familjes dhe të gjithë njerëzve të afërt. Është një humbje shumë e madhe për ne dhe komunitetin e Korçës", tha Rapo.

Albano Vaso nuk ishte vetëm një futbollist i Skënderbeut. Ai ishte një njeri i thjeshtë, i ndershëm, dhe i dashur për të gjithë. Një zë i qetë, por me peshë, që la pas një trashëgimi vlerash në sport dhe në jetë. Sot, Korça i thotë lamtumirë birit të saj të denjë, por kujtimi i tij do të mbetet i gjallë në fushë, në tribuna dhe në zemrat e atyre që patën fatin ta njohin./ CNA