E fundit!

12:36 Politikë

Fëmijët në protestë/ Noka: Vendimet korruptive të qeverisë do të rëndojnë mbi shpatullat e tyre

Sekretari i Përgjithshëm i PD-së, Flamur Noka ka reaguar m...

Mbahet Asambleja e Përgjithshme e Zakonshme e Bashkimit të Arbitrave Shqiptarë të Futbollit

18 Shkurt 2026, 18:32, Sport CNA

Mbahet Asambleja e Përgjithshme e Zakonshme e Bashkimit të Arbitrave

Bashkimi i Arbitrave Shqiptarë të Futbollit (BASHF) zhvilloi këtë të mërkurë punimet e Asamblesë së Përgjithshme të Zakonshme në ambientet e “Shtëpisë së Futbollit”.

Në këtë Asamble morën pjesë Sekretari i Përgjithshëm i FSHF, Ilir Shulku, Drejtori Teknik i FSHF, Fulvio Pea, Presidenti i BASHF, Tahir Kastrati, Sekretari i Përgjithshëm i BASHF, Klajdi Kola, anëtarët e KE-së të BASHF, Idriz Gashi, Ervis Peza, Dritan Salaj e Sokol Avdo dhe delegatët e mandatuar nga kolegjiumet e arbitrave në të gjithë vendin.

Presidenti i BASHF, Tahir Kastrati, tha se fokusi kryesor ka qenë përfshirja sa më e madhe e të rinjve në botën e arbitrimit dhe shtoi se në këtë aspekt është bërë një punë e mirë edhe nëpërmjet fushatave të ndërmarra, si “Bëhu Arbitër”, por sfidë mbetet mbajtja e tyre.

“Prej disa vitesh është organizuar dhe funksionon Akademia e Arbitrimit, me iniciativën direkte të Presidentit të FSHF-së. Në këtë edicion, Federata, në bashkëpunim me Shoqatën, Komitetin e Arbitrimit, vijoi fushatën “Bëhu Arbitër”, e cila, përmes videove promocionale në stadiume, rrjete sociale dhe media, ka arritur të rekrutojë 90 arbitra të rinj, të cilët aktualisht ndodhen në fazën e dytë të kursit të Akademisë. Sfida jonë më e madhe për të ardhmen mbetet mbajtja e këtyre arbitrave dhe rritja e konkurrencës dhe cilësisë përmes tyre” .

Po ashtu, Presidenti Kastrati vlerësoi edhe projektin “Talent & Mentor” dhe mbështetjen e FSHF-së përgjatë këtij viti. “Punë e mirë është bërë edhe në edukimin e arbitrave të perspektivës, ku ndodhemi në vitin e dytë të projektit “Talent & Mentor”, i udhëhequr nga mentorët Jareci, Kola, Meta, Janku, Rexha dhe Çokaj, por edhe këtu duhen arritur rezultate konkrete dhe numri i arbitrave të rritet.

FSHF-ja mbetet sponsori kryesor i Shoqatës sonë, duke mbështetur: financimin e seminareve dy herë në vit, financimin e bazës materiale për të gjithë arbitrat, përfshirë Akademinë e Arbitrimit dhe financimin e shpërblimit të arbitrave të të gjitha kategorive dhe sistemit VAR.

Kreu i BASHF vuri në pah edhe rritjen e numrit të arbitreve vajza dhe rritjen e numrit të arbitrave dhe asistentëve në arenën ndërkombëtare.

“Një tjetër element pozitiv është numri i arbitrave vajza, të cilat kanë drejtuar me profesionalizëm ndeshje të kategorive të larta, përfshirë edhe Abissnet Superiore. Aktualisht kemi dy treshe arbitresh me stemën FIFA, që na përfaqësojnë denjësisht në arenën ndërkombëtare.

Këtë vit, arbitrimi shqiptar do të përfaqësohet në arenën ndërkombëtare nga 21 arbitra dhe asistentë, me rritje të vazhdueshme të këtij numri. Një zhvillim i rëndësishëm është edhe shtimi i z. Albano Stolaj si arbitër FIFA për futbollin e sallës.

Shoqata e Arbitrave, në bashkëpunim me Sektorin e Arbitrimit, ka mbuluar me sukses të gjitha veprimtaritë sportive në vend, nga nivelet më të larta deri te moshat, futbolli amator, futbolli i vajzave dhe format alternative të lojës”.

Më tej, asambleja vijoi me rendin e ditës, ku u morën dy vendime të rëndësishme. Me anë të votimit u miratuan pasqyrat financiare për vitin 2025 dhe buxheti për vitin 2026.

Përpara mbylljes së punimeve, u nderuan me pllakadën e mirënjohjes tre vëzhguesit Gëzim Gaci, Krenar Braja dhe Emil Kalimeri, të cilët gjatë vitit 2025 janë tërhequr nga gara sportive.