web counter
LEXO PA REKLAMA!

SHKARKO APP

App Store
Google Play

Katër realizime, shtyllë dhe gol i anuluar. Çfarë ndodhi në Iran-Zelandë e Re

16 Qershor 2026, 15:08, Sport CNA

Katër realizime, shtyllë dhe gol i anuluar. Çfarë ndodhi

Irani dhe Zelanda e Re janë ndarë në një barazim 2-2 në ndeshjen e vlefshme për Grupin G të Kampionatit Botëror, të zhvilluar në Los Angeles. Përfaqësuesja e Zelandës së Re mbetet ende pa asnjë fitore në historinë e pjesëmarrjeve të saj në këtë turne.

Ndonëse vlerësohej si skuadra me renditjen më të ulët në këtë edicion të Botërorit, Zelanda e Re e nisi takimin në mënyrë pozitive duke kaluar në avantazh që në minutën e shtatë të lojës.

Goli i parë i takimit erdhi nga sulmuesi Elijah Just, i cili shënoi me një goditje gjysmëvolej brenda zonës. Irani reagoi duke rritur presionin dhe në mesin e pjesës së parë goditi shtyllën me anë të Mehdi Taremit.

Barazimi i skuadrës aziatike erdhi në minutën e 32-të, kur Ramin Rezaeian shfrytëzoi një top të mbetur në zonë pas goditjes së bllokuar të Moghanlou. Në minutat shtesë të pjesës së parë, Iranit iu anulua një gol me kokë i Ali Nematit për pozicion jashtë loje.

Pjesa e dytë nisi me dy raste të njëpasnjëshme për Iranin, por pa sukses. Megjithatë, ashtu si në fraksionin e parë, Zelanda e Re u tregua më efikase dhe riktheu avantazhin në minutën e 54-t. Pas një tjetër kombinimi me Wood, sulmuesi Just depërtoi drejt zonës dhe mposhti portierin Beiranvand për rezultatin 2-1. Reagimi i Iranit erdhi dhjetë minuta më vonë, kur Mohebi shënoi me kokë në zonë pas një krosimi të saktë nga Rezaeian.

Pavarësisht përpjekjeve të të dyja ekipeve në minutat e mbetura, rezultati nuk ndryshoi, duke bërë që Zelanda e Re të regjistrojë barazimin e katërt në shtatë ndeshje totale të luajtura në Botërorë.

Në krahun tjetër, Irani, i cili tregoi qëndrueshmëri duke përmbysur dy herë disavantazhin, do të ketë një përballje më të vështirë në ndeshjen e dytë të grupit ku do të luajë kundër përfaqësueses së Belgjikës.





Lajmet e fundit nga