web counter
LEXO PA REKLAMA!

SHKARKO APP

App Store
Google Play

E fundit!

x

Fund i "çmendur" dhe dramatik! Dinamo përmbys Vllazninë në minutën e 95-të

28 Shtator 2024, 21:06, Sport CNA

Fund i "çmendur" dhe dramatik! Dinamo përmbys

Dinamo mposhti Vllazninë me rezultatin 2-1, në sfidën e vlefshme për javën e shtatë në Superiore. Dinamovitët triumfuan me përmbysje, falë dy golave të shënuar në fund.

Pjesa e parë foli e gjitha për Vllazninë, me shkodranët që ishin dominues nga fillimi. Rasti i parë i rrezikshëm ishte ai i minutës së 19-të, me Esat Malën që provoi nga goditja e dënimit, por topi u dëvijua dhe shkoi në goditje këndi.

Sulmet e miqve nuk u ndalën, me Qaton që tentoi në minutën e 22-të, por kontrolloi Sali pa shumë probleme. 3 minuta më vonë, Balaj nuk ishte i saktë me gjuajtjen e tij, duke dërguar topin mbi traun e portës.

Vllaznia po i vinte rrotull golit dhe u shpërblye në minutën e 28-të. Një skemë perfekte nga goditja e dënimit, solli avantazhin e kuqebluve. Sala shënoi pas një pasimi të marrë nga Gurishta, duke bërë që të shpërthejë festa në kampin shkodran.

Në minutën e 35-të, Bekim Balaj, shpërdoroi një rast të artë, duke mos e gjuajtuir dot një top afër vijës fatale.

Shkëndijën e parë për Dinamon e dha Dejvi Bregu në minutën e 39-të, por gjuajtja e sulmuesit u ndal pa probleme nga portieri Qarri.

Balaj shpërdoroi një tjetër rast të artë në minutën e 43-të, duke gjuajtur shumë keq, pak metra larg portës.

Fraksioni i dytë, nisi malore për Vllazninë, që mbeti me 10 lojtarë në minutën e 52-të, pasi Sala u ndëshkua me kartonin e dytë të verdhë.

Dinamo përfitoi nga epërsia numërike dhe u hodh totalisht në sulm, për golin e barazimit, të cilin e gjeti në minutën e 79-të.

Mandela përfitoi nga një top i mbetur në zonë, për ta ndalur në rrjetë. Fillimisht goli i anulua për pozicion jashtë loje, por VAR-i e konfirmoi si të rregullt, duke bërë që të shpërthejë festa te vendasit.

Në minutat shtesë, Podrimcaku shpërdoroi një rast të artë për Vllazninë, me topin që u largua mbi vijën e portës.

Në minutën e 95-të, Dejvi Bregu shënoi golin e përmbysjes dhe të fitores për Dinamon. Sulmuesi përfitoi nga një top i hedhur në zonë, për ta ndalur në rrjetë.

Me këtë fitore, Dinamon ngjitet në vendin e katërt me 11 pikë, ndërsa Vllaznia mbetet e para me 13 pikë.





Lajmet e fundit nga