E fundit!

12:24 Aktualitet

VIDEO/ Riaktivizohet vatra e zjarrit në Gjirin e Hartës

CNA ka siguruar pamje ku tregohet se është aktivizuar vatr...

Dita e së vërtetës/ Shqipëri, na bëj krenarë! 3 pikët detyrim ndaj Serbisë

11 Tetor 2025, 07:10, Sport CNA

Dita e së vërtetës/ Shqipëri, na bëj krenarë! 3

Shqipëria luan mbrëmjen e kësaj të shtune një duel vendimtar për rrugën drejt Botërorit. Kuqezinjtë do të sfidojnë Serbinë në një përballje ku kërkohet me çdo kusht fitorja.

Dueli pritet të zhvillohet në një atmosferë elektrizuese, me një interes të jashtëzakonshëm si në fushë ashtu edhe jashtë saj, për shkak të rivalitetit dhe peshës që mbart kjo përballje në garën për kualifikim.

Serbia e trajnerit Dragan Stojkoviç vjen pas disfatës së thellë 5-0 që pësoi ndaj Anglisë në Beograd. Ishte humbja e parë e serbëve në shtëpi që nga shtatori i vitit 2023 dhe një goditje për skuadrën që kishte nisur fushatën eliminatore me dy fitore dhe një barazim, pa pësuar asnjë gol në tri ndeshjet e para. Përpara duelit me anglezët, Serbia kishte ruajtur portën të paprekur në pesë ndeshje radhazi në fushën e saj, çka e bën ende një kundërshtar të fortë në stadiumin e Leskovacit.

Në krahun tjetër, Shqipëria e Silvinjos vjen në këtë përballje me një formë të mirë. Kuqezinjtë nuk kanë humbur në pesë ndeshjet e fundit, duke regjistruar tri fitore dhe dy barazime, përfshirë suksesin minimal 1-0 ndaj Letonisë. Objektivi i Shqipërisë është i qartë, të marrë fitoren e tretë radhazi për herë të parë që nga tetori i vitit 2023 dhe të konsolidojë pozitat në grup.

Megjithatë, paraqitjet jashtë fushe mbeten një pikë për t’u përmirësuar. Në dy ndeshjet larg Tiranës në këto eliminatore, kuqezinjtë kanë marrë vetëm një pikë, çka e bën përballjen me Serbinë edhe më sfiduese. Gjithsesi, statistikat e fundit tregojnë një përmirësim gradual të skuadrës në transfertë, me tri fitore në gjashtë ndeshjet e fundit jashtë vendit.

Ky do të jetë takimi i katërt zyrtar mes Serbisë dhe Shqipërisë. Në tri ndeshjet e mëparshme, të dyja kombëtaret kanë regjistruar nga një fitore dhe një barazim, ndërsa një prej takimeve është vendosur në dhomën e gjykimit sportiv, KAS-i. Përballja e Leskovacit do të ketë jo vetëm rëndësi sportive, por edhe simbolike, për shkak të historikut dhe ngarkesës që mbart ky duel.

Të gjitha masat e sigurisë janë marrë nga autoritetet vendase, për të garantuar zhvillimin normal të ndeshjes dhe një mbrëmje sportive të qetë. Ndeshja Serbi-Shqipëri, do të luhet mbrëmjen e kësaj të shtune, duke nisur nga ora 20:45.