E fundit!

22:11 Aktualitet

Nis marshimi i protestuesve/ Destinacioni, komisariati nr.3 në kryeqytet

Protestuesit janë larguar nga bulevardi “Dëshmorët e Kombi...

Allegri prezantohet te Milan-i: Të mos përmendet titulli, duam Champions-in. Të hedhim themelet...

7 Korrik 2025, 15:58, Sport CNA

Allegri prezantohet te Milan-i: Të mos përmendet titulli, duam

Pas 11 vitesh, Massimiliano Allegri rikthehet në pankinën e Milan-it, duke nisur zyrtarisht aventurën e tij të dytë me kuqezinjtë. Në konferencën për shtyp, tekniku u shpreh se objektivi kryesor është rikthimi në Ligën e Kampionëve. Ai theksoi se Milan-i duhet të funksionojë si një trup i vetëm, ndërsa gjashtë muajt e parë do të përdoren për vendosjen e themeleve të ekipit.

“Objektivi numër një është të rikthejmë ekipin në Ligën e Kampionëve. Jam i lumtur dhe kam shumë entuziazëm. Do të duhet të jemi një trup i vetëm dhe të punojmë të gjithë në të njëjtin drejtim. Kjo është e domosdoshme për një klub si Milan-i.

Kam pasur fatin të punoj te Milan-i për 4 vite me presidentin Berlusconi dhe Adriano Galliani-n. Falë tyre dhe lojtarëve kisha mundësinë të fitoj. Më pas shkova te Juventus-i ku punova 8 vite. Mundohem t’i vë lojtarët në kushte për të fituar, por gjithçka nis nga klubi, që duhet të jetë një bllok i vetëm. Jam i sigurt që te Milan-i do të jetë kështu. Skuadra është në nivel shumë të mirë, ka lojtarë me vlera dhe drejtori Tare po ndjek të gjitha situatat. Objektivi është të jemi në formën më të mirë deri në fund të gushtit. Pastaj nis puna, gjashtë muajt e parë do të shërbejnë për të vendosur themelet.

Në mars do të shohim ku jemi dhe do të vendoset për sezonin. Duhet të punojmë me vendosmëri për të qenë në mars në formën më të mirë të mundshme. Objektivi i parë është që Milan-i të rikthehet në Champions, sepse është një skuadër me nivel botëror. Në mars duhet të jemi në ato pozicione. Duhet të rikthejmë Milan-in në Champions, ky është objektivi që duhet ta kemi të gjithë në mendje. Dhe atje do të arrijmë vetëm me punë të përditshme”, tha Allegri.

Allegri vlerësoi drejtorin sportiv Igli Tare dhe konfirmoi se për momentin është i kënaqur me grupin aktual prej 25 lojtarësh. Trajneri nuk e përmendi titullin si objektiv, por kërkoi punë të përditshme dhe profesionalizëm për të qenë në pozita të rëndësishme në pranverë.

“Është një klub për të cilin kam shumë dashuri. Kur më telefonoi Tare, u ndjeva shumë i emocionuar. Brenda një ore bisede vendosëm të nisim këtë aventurë, për të cilën jam shumë i entuziazmuar.

Për merkaton merret drejtori Igli Tare, largimet janë vendosur bashkërisht. Kam në dispozicion 25 lojtarë dhe jam shumë i kënaqur me ta. E rëndësishme është të punojmë mirë për të qenë gati më 17 gusht, kur kemi ndeshjen e parë në Kupën e Italisë.

Titulli? Kur punon te Milan-i duhet të kesh ambicien për të arritur maksimumin. Duhet kjo bindje. Nëse do të jemi në pozitat e rëndësishme në fund, do ta luftojmë. Për momentin nuk ka kuptim të bëjmë deklarata. Duhet të jemi të përgjegjshëm, profesionalë dhe konkretë.

Maignan do të jetë kapiten, jam i lumtur që vendosi të qëndrojë. Është një nga portierët më të mirë në Europë. Leao është një lojtar i jashtëzakonshëm që me siguri do të bëjë një sezon të madh.

Të presim të vijë Modric, nuk do të vijë para gushtit. Pastaj kemi Riçi, Loftus-Cheek, Fofana, Bondo, Musah… Kemi lojtarë të mirë. Me siguri do të luajmë me 3 mesfushorë, pastaj sipas karakteristikave do t’i vendosim. Shpresoj t’i nxjerr diçka më shumë Leao-s. Unë besoj tek ai. Po hyn në moshën e pjekurisë maksimale, ka të gjitha kushtet për të bërë mirë”, deklaroi Allegri.