E fundit!

20:00 Kronika

Mjeti lundrues përplaset me skafin e Policisë Kufitare në Ksamil/ Raportohet për 1 viktimë

Një aksident i rëndë është shënuar sot në Gjirin e Ksamili...

Rama, mesazh protestuesve/ 5 qëndrimet e kryeministrit

15 Qershor 2026, 10:32, Politikë CNA

Kryeministri Edi Rama ka reaguar lidhur me protestat e fundit, duke theksuar se ato nuk kanë më lidhje me çështjen e Sazanit apo Zvërnecit dhe se dokumentacioni i procesit, sipas tij, tregon qartë që qeveria ka ndjekur standardet dhe interesin publik.

Rama deklaron se protestat po ndikojnë negativisht në imazhin e Shqipërisë dhe në sezonin turistik, duke krijuar perceptime të gabuara për vendin si jomiqësor ndaj mjedisit dhe investimeve të huaja, si dhe të pasigurt për turistët.

Sipas tij, kjo situatë mund të sjellë anulime rezervimesh dhe pasoja ekonomike. Ai shton se bllokimet e rrugëve dhe veçanërisht lëvizjet drejt aeroportit dëmtojnë të drejtën e lëvizjes së qytetarëve dhe ndikojnë negativisht në jetën e përditshme.

Kryeministri u shpreh gjithashtu me keqardhje për të rinjtë e përfshirë në protesta, duke i cilësuar disa prej zhvillimeve si të ndikuara nga “mendje të liga”, ndërsa u bëri thirrje të distancohen nga ajo që e quajti keqorientim.

"Protestuesit janë të lirë të protestojnë paqësisht për çfarë të duan, si të duan e deri kur të duan, por pa dashur t’ju bëj moral nuk kam se si mos t’u them:

1. Kjo protestë nuk ka më asnjë lidhje me Sazanin a me Zvërnecin, sepse i gjithë dokumentacioni i procesit dhe e gjithë qasja e dokumentuar qeverisë, tregojnë qartë që qeveria është në lartësinë e interesit publik e të standarteve dhe praktikave më të mira ndërkombëtare.

2. Kjo protestë po godet imazhin e Shqipërisë dhe sezonin turistik, duke ushqyer perceptimin negativ e të pavërtetë të një vendi jomiqësor ndaj mjedisit, jomikpritës për investimet e huaja dhe te pasigurtë për turistët. Anullimet e rezervimeve të hoteleve dhe bllokimet e rrugëve paralajmërojnë një sezon jo pozitiv ekonomikisht, për shumë e shumë familje e njerëz që kanë lidhje direkte apo indirekte me zinxhirin e vlerës së industrisë së turizmit.

3. Kjo protestë që arrin e degradon në një turmë të drejtuar nga mendje të liga dhe duar të këqia drejt rrugës së aeroportit, duke bllokuar natën në rrugë mijëra njerëz në lëvizjen e tyre të lirë, ka brenda saj pikërisht atë të keqen e madhe të ekstremizmit që frymëzon bullizimin online dhe prishjen me pahir të ritmit të jetës së shumicës.

4. Keqardhje për të rejat e të rinjtë e zhgënjyer nga marshimi qorrazi drejt Rinasit me shijen e lirisë e të pavarësisë së tyre dhe në emër të një revolucioni imagjinar, derisa e kuptuan edhe vetë se çfarë budallallëku kishin bërë duke i shkuar mbrapa skuthave të infiltruar nga forcat destruktive, brenda a jashtë, të cilat po bëjnë çmos për ta dëmtuar sa më shumë Shqipërinë. Uroj që të zgjohen sa më parë nga ky jerm dhe të shkëputen një orë e më parë nga mendjet e liga dhe duart e këqia që tanimë e kanë marrë në kontroll protestën.

5. Kjo protestë ka ekzaltuar edhe shumë personazhe me një emër të dëgjuar në mexhelisin e jetës publike. Me mendjet e tyre të cekëta ata i janë bashkuar asaj me mënyra të ndryshme, në bulevard apo në kanalet sociale e mediatike, me idenë se deti u bë kos, qeveria po mbytet, një orë e re erdhi për lugët në brezat e tyre.

Por nëse ka përfitues të vërtetë nga kjo protestë, ata janë vetëm dy:

Qeveria Shqiptare, e cila do të nxjerrë patjetër mësimet që i duhen nga pjesa e çiltër e protestës, duke adresuar si duhet shqetësimet legjitime të asaj pjese dhe Partia Socialiste, e cila kur të shpërndahet mjegulla do t’i zhgënjejë rëndë të gjithë kundërshtarët e saj, duke u shfaqur më e madhe dhe më e fortë në qendër të skenës politike të Shqipërisë", shkruan Rama./ CNA