Protestat kundër qeverisë/ Eurodeputeti bullgar flet nga Korça: Të dëgjohet zëri i qytetarëve

14 Qershor 2026, 15:27, Politikë CNA

Eurodeputeti bullgar, Andrey Kovatchev, ndau sot një qëndrim lidhur me protestat disaditore kundër qeverisë që po zhvillohen në vend.

Duke folur për mediat gjatë një vizite në Korçë, Kovatchev u shpreh se i takon klasës politike shqiptare të jhapë zgjidhje në çështje që kanë të bëjnë me ekologjinë, por edhe zhvillimin rajonal e turizmin.

“Ne po monitorojmë shumë nga afër çdo zhvillim. Kjo sigurisht i takon klasës politike në Shqipëri që ta zgjidhë dhe të ndjekë të gjitha standardet, veçanërisht ato ekologjike, me të gjitha investimet që duhen bërë. Ne nuk po ndërhyjmë në këtë pjesë, por sigurisht që do të ketë një tekst në raport-progresin që lidhet me përmbushjen e të gjitha ligjeve dhe standardeve që kanë të bëjnë me ekologjinë, por edhe me zhvillimin rajonal dhe turizmin.

Sa i përket efektit të protestave, Kovatchev theksoi se zëri i popullit është mirë të dëgjohet, për të mirën e qytetarëve shqiptarë.

“Dua të them se është mirë të dëgjohet zëri i popullit, nëse gjithçka është e qetë dhe paqësore. Dhe kjo është gjithashtu thirrja jonë për të gjitha partitë në pushtet dhe ato të opozitës: të jenë të qeta, të dëgjojnë njëra-tjetrën dhe të gjejnë zgjidhjen më të mirë për qytetarët. Për qytetarët e Shqipërisë, më e mira është që të hyjnë sa më shpejt të jetë e mundur në Bashkimin Evropian dhe të gëzojnë së bashku familjen tonë evropiane, në këtë kohë shumë sfiduese për botën. Kemi shumë probleme gjeopolitike rreth nesh dhe Shqipëria është një aleate shumë e mirë në NATO, dhe tani, shumë shpejt, edhe në Bashkimin Evropian”-u shpreh ai.

I pyetur lidhur me atë çka mund të bëjë qeveria shqiptare në lidhje me këto protesta, eurodeputeti tha se njerëzit duhen dëgjuar dhe se duhen ndjekur të gjitha standardet mjedisore që pasqyrojnë edhe qasjen e BE-së.

“Të dëgjojë njerëzit dhe të ndjekë të gjithë legjislacionin dhe të gjitha standardet mjedisore, gjë që jam i sigurt se do të jetë edhe në tekstin e Parlamentit Evropian. Por, ne në Parlamentin Evropian nuk do të ndërhyjmë në politikën e brendshme të Shqipërisë dhe bëjmë thirrje për një bashkëpunim të mirë mes partisë në pushtet dhe partive opozitare”,- tha Kovatchev./CNA