Krijimi i Autoritetit Kombëtar/ Rama: Menaxhimi i mbetjeve nuk do të administrohet më nga bashkitë

28 Gusht 2025, 11:30, Politikë CNA

Krijimi i Autoritetit Kombëtar/ Rama: Menaxhimi i mbetjeve nuk do të

Kryeministri Edi Rama ishte i pranishëm në aktivitetin e Reformës në Trajtimin e Integruar të Mbetjeve.

Gjatë fjalës së mbajtur, Rama tha se një nga problematikat e mbetjeve është mungesa e uniformitetit, pasi gjatë vijës bregdetare ka disa zona problematike.

Kryeministri u shpreh se është parashikuar krijimi i Operatorit Kombëtar të Menaxhimit të Mbetjeve, agjenci, e cila do të jetë në dispozicion të të gjithë republikës.

Rama njoftoi se menaxhimi i mbetjeve nuk do të jetë më në administrimin e pushtetit lokal, por nën administrimin e Autoritetit Kombëtar për Mbetjet.

“Bashkia e Lezhës vijon të prijë në pastërti. Gjërat janë më mirë se vitin e shkuar. Problematikë mbetet mungesa e uniformitetit. Përgjatë vijës bregdetare ka disa zona problematike. Duhet të vazhdojmë me një ritëm më të lartë për reformat dhe masat ligjore në funksion të ambicies dhe objektivit. Anëtarësimi në BE, në fund të kësaj dekade, duke filluar nga mbyllja e negociatave në fund të vitit 2027, siç është rënë dakord. Do të çojmë përpara një paketë të re reformash dhe masash, për të cilat dua të them se është projektligji i ri për menaxhimin e integruar të mbetjeve. Kemi parashikuar krijimin e Operatorit Kombëtar të Menaxhimit të Mbetjeve, një agjenci që do të jetë në dispozicion të të gjithë republikës, të pushtetit vendor, qytetarëve. Grumbullimi i mbetjeve dhe trajtimi nuk do të jenë më të administruara nga bashkitë, por nga ky Autoritet Kombëtar”, deklaroi Rama.

Gjatë fjalës së tij, kryeministri u ndal edhe te varrezat e makinave në vend, për të cilat tha se janë të ligjëruara pa ligj dhe njoftoi se ka nisur një operacion për heqjen e tyre nga territori.

"Jemi në një situatë tërësisht primitive në raport me ndarjen në burim të mbetjeve, me përgjegjësinë e prodhuesve. Jemi i vetmi vend në Europë që varrezat e makinave i kemi të ligjëruara pa ligj, me vullnetin e Maliqit, si fakte të kryera. Do të jetë një operacion që sapo ka nisur për shkuljen e të gjitha këtyre varrezave”, tha Rama./ CNA