“Nuk kemi nevojë për askënd” / Trump "shpërthen" ndaj aleatëve në NATO

17 Mars 2026, 16:59, Kosova & Bota CNA

“Nuk kemi nevojë për askënd” / Trump

Presidenti amerikan Donald Trump ka reaguar në Truth Social lidhur me qëndrimin e aleatëve në NATO ndaj operacioneve në Lindjen e Mesme, duke theksuar se shumica e tyre nuk dëshirojnë të përfshihen në veprimet ushtarake kundër Iranit.

Në reagimin e tij, Trump u shpreh se, pavarësisht mbështetjes verbale që shumë vende kanë dhënë për qëndrimin amerikan ndaj Iranit dhe kundërshtimit për armët bërthamore, ato kanë zgjedhur të qëndrojnë jashtë operacioneve konkrete në rajon. Ai shtoi se kjo qasje nuk është befasuese, pasi sipas tij, marrëdhënia me aleatët në NATO ka qenë shpesh “njëkahëshe”.

Presidenti amerikan theksoi se SHBA ka mbajtur barrën kryesore të mbrojtjes për vendet aleate, ndërsa në momente kyçe nuk ka marrë mbështetjen e pritur. Ai deklaroi gjithashtu se, falë suksesit të operacioneve në Lindjen e Mesme, SHBA nuk ka më nevojë për ndihmën e aleatëve.

Trump nënvizoi se fuqia ushtarake e Shteteve të Bashkuara mbetet vendimtare dhe se vendi, sipas tij, është në gjendje të veprojë i vetëm pa mbështetje ndërkombëtare, duke e cilësuar SHBA-në si vendin më të fuqishëm në botë.

Reagimi i Trump

Shtetet e Bashkuara janë informuar nga shumica e “aleatëve” tanë në NATO se nuk duan të përfshihen në operacionin tonë ushtarak kundër regjimit terrorist të Iranit në Lindjen e Mesme, pavarësisht faktit se pothuajse çdo vend është dakordësuar fuqishëm me atë që po bëjmë dhe se Iranit nuk duhet t’i lejohet, në asnjë mënyrë apo formë, të ketë armë bërthamore. Nuk jam i befasuar nga veprimi i tyre, sepse gjithmonë e kam konsideruar NATO-n, ku ne shpenzojmë qindra miliarda dollarë në vit për të mbrojtur këto vende, si një rrugë njëkahëshe — ne i mbrojmë ata, por ata nuk bëjnë asgjë për ne, veçanërisht në kohë nevoje.

Fatmirësisht, ne kemi shkatërruar ushtrinë e Iranit — marina e tyre është zhdukur, forcat ajrore janë zhdukur, mbrojtja kundërajrore dhe radarët janë zhdukur dhe ndoshta më e rëndësishmja, drejtuesit e tyre, pothuajse në çdo nivel, janë zhdukur, duke mos përbërë më kërcënim për ne, për aleatët tanë në Lindjen e Mesme apo për botën! Për shkak të këtij suksesi të madh ushtarak, ne nuk “kemi më nevojë” dhe as dëshirë për ndihmën e vendeve të NATO-s — NE NUK E KEMI PASUR KURRË! Po kështu edhe Japonia, Australia apo Koreja e Jugut. Në fakt, duke folur si President i Shteteve të Bashkuara të Amerikës, vendi më i fuqishëm në botë, NE NUK KEMI NEVOJË PËR NDIHMËN E ASKUJ! Faleminderit për vëmendjen ndaj kësaj çështjeje.