E fundit!

07:41 ECONOMY

Albania, the fastest growing market on the Southeast European tourist map for daily rentals

In the Balkans, few tourism markets are expanding at the p...

Egnatia kualifikohet me barazim, Partizani nuk ia del

2025-05-05 21:56:00, Sport CNA

Egnatia ka siguruar kualifikimin për në finalen e madhe të titullit kampion. Rrogozhinasit barazuan pa gola ndaj Partizanit dhe falë avantazhit si vendi i parë në renditje, ia doli të kalojë në finale, aty ku do të përballet me Vllazninë.

Në krahun tjetër, Partizani i cili e mbylli në vendin e katërt renditjen, eliminohet dhe dështon për të dytin vit radhazi për titullin.

Rastin e parë të rrezikshëm e kishte Egnatia në minutën e 4-t. Albano Aleksi lëshoi një gjuajtje të bukur nga jashtë zone, por u devijua në këndore nga portieri Qirko.

Gardiani i të kuqve ishte sërish vendimtar me një pritje të shkëlqyer, këtë herë ndaj Regi Lushkjas, duke e mbajtur rrjetën e paprekur.

Fernando provoi në zonë me një gjuajtje, por nuk kishte saktësinë e duhur për të shkuar në rrjetë.

Gjuajtjen e parë në portë Partizani e kishte në minutën e 30-të. Preka provoi me kokë, por topi shkoi në duart e Dajsinanit.

4 minuta më vonë, Eleke provoi me një kthesë pas pasimit të marrë nga Kote në zonë. Edhe këtë herë tentativa nuk kishte saktësinë e duhur.

Mundësia më e mirë e pjesës së parë ishte ajo e Bintsuka në minutën e 37-të. Sulmuesi u shfaq i vetëm me portierin Dajsinani, por u vonua shumë dhe aksioni humbi qartësinë.

Fraksioni i dytë nisi me Partizanin më kërkues. Albers Keko krijoi iluzione goli me një gjuajtje fluturimthi, e cila shkoi ngjitur me shtyllën e Dajsinanit.

Bytyçi ishte vendimtar me ndërhyrjen e tij ndaj Zejnullait, duke ndalur një top që po shkonte në drejtim të portës.

Në minutën e 75-të, Albano Aleksi provoi me një tjetër gjuajtje të fortë nga jashtë zone, e cila u devijua në këndore.

Minutat e mbetura nuk prodhuan më raste të rrezikshme dhe në fund ishte Egnatia që festoi kualifikimin në finalen e titullit.

Ndeshja mes Egnatias dhe Vllaznisë, ku do të përcaktohet kampionia e këtij sezoni, do të luhet të hënën e 12 majit.