web counter
LEXO PA REKLAMA!

SHKARKO APP

App Store
Google Play

Arrestohet nëna që braktisi foshnjën në Tiranë

2023-11-09 12:44:00, Kronika CNA

Arrestohet nëna që braktisi foshnjën në Tiranë

Policia e Tiranës ka arrestuar 30-vjeçaren me iniciale E.I, nënën e foshnjës që ndërroi jetë mëngjesin e sotëm në maternitetin "Koço Gliozheni". 

Mbi të renë rëndon vepra penale "Braktisja e fëmijëve të mitur". Fillimisht kjo e fundit mohoi se ishte ajo nëna e fëmijës dhe deklaroi se nuk ka dijeni për ngjarjen.

Por kur është përballur me provat nga verifikimi i telefonatave, ajo ka pranuar gjithçka.

Nëna e foshnjës ka deklaruar se e braktisi bebin në një bodrum për shkak se familjarët nuk ishin në dijeni të shtatzënisë së saj, pasi nuk është e martuar.

Ajo ka theksuar se i trembej opinionit publik si një nënë beqare. Ndërkohë, në gjendje civile policia ka konstatuar se shtetasja E. I. rezulton e pamartuar dhe nuk ka fëmijë të tjerë.

Njoftimi i policisë: 

Në vijim të informacionit të dhënë ditën e djeshme, që bën fjalë për gjetjen e një foshnje të sapolindur, në bodrumin e një pallati në Yzberisht, ju informojmë se:

Specialistët për Hetimin e Krimeve të Komisariatit të Policisë Nr. 6 kanë arrestuar shtetasen E. I., 30 vjeçe, banuese në Tiranë, për veprën penale "Braktisja e fëmijëve të mitur".

Ditën e djeshme, shërbimet e Policisë, së bashku me stafin mjekësor, kanë dërguar në spital, foshnjën e braktisur nga kjo shtetase, por pavarësisht ndihmës së menjëhershme të dhënë nga shërbimet e Policisë dhe stafit mjekësor, ditën e sotme foshnja ka ndërruar jetë.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme./CNA

 

 





Lajmet e fundit nga