Gazetari, akuza operatorit telefonik/ “One Communications” ofron shërbim mizerabël

2023-04-13 16:18:00, Denoncim CNA

Gazetari, akuza operatorit telefonik/ “One Communications” ofron

Foto ilustruese

Gazetari Bardhi Sejdarasi ka ngritur akuza ndaj operatorit telefonik “One Communications”, për të cilin deklaron se ka një shërbim mizerabël.

Në një postim në rrjetet sociale, Sejdarasi deklaron se pavarësisht se paguan shërbimin “One Elite” nuk e merr këtë shërbim.

Ai deklaron se pavarësisht se ka bërë disa ankesa, operatori telefonik nuk i ka gjetur zgjidhje problemit të tij.

“Tmerri tani quhet... ‘One Communications’!

Nuk kam arritur kurrë të kuptoj se përse shërbimi që ofron kjo kompani është mizerabël! Por tani se fundi këtë nuk po e them vetëm unë, por shumë nga përdoruesit e saj!

Pashë një interviste dje (të paguar) në një televizion kombëtar që fliste për përfundmin e një procesi të bashkimit të dy kompanive dhe përmirësimin e shërbimit! Hiç! Asgjë! Broçkulla!

Paguaj një shumë të konsiderueshme si klient i ‘One Elite’! Duhet të përfitoj 180 minuta thirrje ndërkombëtare! Nga janar 2023 nuk më ofrohet ky shërbim! Vetëm këtë muaj kam bërë katër ankimime për të rregulluar këtë shërbim për shkak se kemi fëmijët jashtë dhe duhet të komunikojmë! Përgjigja është standarde: Shqetësimin tuaj e kanë marrë teknikët, do t’iu lajmërojmë"!? Asnjë lajmërim! Por unë vijoj të paguaj shërbimin që nuk shërben!

Kjo quhet kinezeri? Nuk e di! Thonë që një kompani kineze është pronare? Edhe këtë nuk e di! Po duhet të di se çfarë bën AKEP, një agjenci publike që monitoron dhe mbikqyr operatorët në këtë treg miliarda lekësh! Edhe këtu: Asgjë! Hiç! Po hiç fare!

Kjo është e turpshme!

Kjo është edhe e pandershme!

Punonjës të ‘One’ më thonë: Mos u lodh! Nuk zgjidh dot asgjë! Shkruaj çfarë të duash! Këtyre nuk ua ndjen!

Unë nuk them dot që ta bojkotoni këtë operator, se e di që nuk e bëni! Por të pakten ngrini zërin! Mos u bëni kaq të pandjeshëm ndaj një padrejtësie dhe vjedhjeje të tillë të ndyrë!”, deklaron gazetari.

Ndërkohë, kujtojmë se kjo nuk është hera që një person ngre akuzat ndaj këtij operatori telefonik.

Janë bërë të shpeshta reagimet, por kompania është justifikuar me procesin e bashkimit dhe punimet në sistem.

Disa klientë, ndonëse e kanë kthyer numrin nga “ALBtelecom” në “One Communications” dhe janë pajisur me kartën e re, valët e numrit i bllokohen shpesh./ CNA.al

Gazetari, akuza operatorit telefonik/ “One Communications” ofron