Balluku jep lajmin e mirë: Shqipëria del nga lista gri e pastrimit të parave

2023-10-27 11:56:00, Aktualitet CNA

Balluku jep lajmin e mirë: Shqipëria del nga lista gri e pastrimit

Lajmi i mirë! Shqipëria ka dalë nga zona e gri e pastrimit të parave. Kjo arritje erdhi falë punës së zv/kryeministres Belinda Balluku, e cila ka udhëhequr këtë proces bashkë dhe stafin e saj, të cilët ndodhen në Paris.

Balluku nënvizon në rrjetet sociale se gjithçka u arrit falë angazhimit të qeverisë shqiptare, punës për përmbushjen e reformave dhe reformimit të Drejtorisë së Parandalimit të Pastrimit të Parave në një Agjenci Inteligjence Financiare.

“Angazhimi i qeverisë Shqiptare, puna për përmbushjen e reformave, reformimi i Drejtorisë së Parandalimit të Pastrimit të Parave në një Agjenci Inteligjence Financiare, investimi në ndryshimin thelbësor të ligjeve dhe dixhitalizimit të proceseve, kanë qenë të gjitha hapa që janë vlerësuar nga partnerët ndërkombëtar dhe anëtarët e FATF që sot zhvilloi seancën e saj plenare duke marrë një sërë vendimesh të rëndësishme, njëri prej të cilëve është një gur kilometrik për Shqipërinë, dalja e saj nga lista gri”, shprehet zv/kryeministrja.

Sipas zv/kryeministres ky vendim sjell padyshim forcimin e Shqipërisë në skenën ndërkombëtare, krijimin e kushteve të favorshme për investime të huaja të mëtejshme, uljen e kostove të borxhit kombëtar, konsolidimin e shkëmbimeve tregtare dhe të shërbimeve dhe një sërë benefitesh të tjera të cilat rrjedhin nga ky pozicion i ri i Shqipërisë.

“Lufta për parandalimin e pastrimit të parave dhe financimin e terrorizimit është dhe ka qenë në fokus të punës së Qeverisë Shqiptare dhe do të mbetet një nga angazhimet kryesore të saj në bashkëpunim me partnerët tanë strategjik”, shprehet më tej Balluku.

Vendimi për Shqipërinë u mor nga Task Forca e Veprimit Financiar, e cila është një strukturë mbikëqyrëse e krijuar nga partnerët ndërkombëtarë që vlereson çdo vend në bote në fushen e pastrimit të parave (PP) dhe financimit të terrorizmit (FT).

FATF vlerësoi angazhimin e qeverisë shqiptare dhe rritjen e kapaciteteve institucionale, si pika të forta për të vazhduar zbatimin e reformave në të ardhmen në fushën e pastrimit të parave dhe financimit të terrorizmit.

Ndërkohë pjesë e listës së zezë për pastrimin e parave është bërë Bullgaria dhe Kroacia./CNA