“Këshilli i Sigurimit Kombëtar nuk merr vendime”/ Presidenca reagon pas paralajmërimit të Ambasadës së SHBA-së

2 Prill 2026, 14:14, Aktualitet CNA

“Këshilli i Sigurimit Kombëtar nuk merr vendime”/

Në reagim ndaj paralajmërimit të Ambasadës së Shteteve të Bashkuara për rreziqe të mundshme sigurie dhe kërkesës së Partisë Demokratike për mbledhjen urgjente të Këshillit të Sigurimit Kombëtar, Zyra e Shtypit e Presidencës ka sqaruar rolin dhe funksionimin e këtij organi.

Sipas Presidencës, Këshilli i Sigurimit Kombëtar është një organ këshillimor që mbështet Presidentin në ushtrimin e kompetencave dhe përgjegjësive kushtetuese dhe ligjore, pa marrë vendime për çështjet që diskuton.

Ai përbëhet nga drejtues të institucioneve më të larta shtetërore dhe titullarë të institucioneve kyçe të sigurisë dhe shërben për rekomandime ndaj institucioneve ligjzbatuese dhe përgjegjëse për sigurinë.

Presidenca thekson se të gjitha institucionet relevante janë vigjilente, mekanizmat ekzekutivë të sigurisë janë aktivë dhe funksionalë, dhe bashkëpunimi me partnerët ndërkombëtarë është në nivele të larta.

Njoftimi i Presidencës:

Nisur nga interesimi i përfaqësuesve të medies për mbledhjen e Këshillit të Sigurimit Kombëtar nga ana e Presidentit të Republikës në kontekstin e thirrjes që Ambasada e Shteteve të Bashkuara të Amerikës beri dje, Zyra e Shtypit e Presidentit të Republikës e gjen me vend të sqarojë, si vijon:

- Këshilli i Sigurimit Kombëtar është organ këshillimor në mbështetje të Presidentit të Republikës për ushtrimin e kompetencave dhe përgjegjësive të veta kushtetuese dhe ligjore. Këshilli i Sigurimit Kombëtar nuk merr vendime për çështjet që diskuton. Këshilli përbëhet nga drejtues të organeve të larta shtetërore dhe titullarë të institucioneve të rëndësishme.

Këshilli i shërben Presidentit të Republikës, si rregull, për diskutimin e rekomandimeve për masat që Presidenti i Republikës përpilon për institucionet ligjzbatuese dhe përgjegjëse për sigurinë lidhur me përballimin e rreziqeve që i kanosen Republikës së Shqipërisë.

- Presidenti i Republikës është në kontakt të përditshëm me institucionet e Këshillit të Sigurimit Kombëtar dhe informohet prej tyre për çdo situatë dhe skenar, si dhe për të gjtha masat që merren në kuadër të protokolleve të sigurisë.

- Presidenti i Republikës ka konstatuar se të gjitha institucionet relevante janë vigjilente dhe në ndjekje të plotë të situatës. Mekanizmat ekzekutivë të sigurisë janë aktivë dhe funksionalë. Gjithashtu, Presidenti i Republikës ka konstatuar se bashkëpunimi institucional dhe ai me partnerët e huaj e ndërkombëtarë është në nivele tejet të larta.

- Presidenti i Republikës vijon komunikimin me institucionet përgjegjëse për sigurinë publike dhe kombëtare, të cilat janë në koordinim dhe bashkërendim të vazhdueshëm me partnerët tanë, si dhe në krye të detyrës për përmbushjen e detyrimeve të tyre kushtetuese dhe ligjore. /CNA