"Gjergj Zaharia më goditi me statujë"/ Zbardhet dëshmia e Princ Lekës në Polici: Më ofendoi

6 Mars 2024, 11:53, Aktualitet CNA

"Gjergj Zaharia më goditi me statujë"/ Zbardhet dëshmia

Princ Leka

Zbardhet dëshmia e Princ Lekës në Komisariatin nr.6 në Tiranë, ku ka bërë denoncimin, pas sulmit fizik të ish-gruas dhe ish-vjehrrit të tij.

Leka ka treguar se kishte shkuar në rezidencën familjare mbretërore pasditen e së martës për të diskutuar me Shefin e administratës së Oborrit, Syl Mulosmanaj, në lidhje me një dollap që ishte boshatisur në kundërshtim me marrëveshjen.

Leka ka theksuar se me Elia Zaharian janë në proces divorci dhe të dyja palët kanë rënë dakord për një vendim të tillë.

Ai tha në polici se i ka këkuar Sylës që ta shoqëronte deri te vajza e tij për ta takuar. Sipas tij, në momentin që ka takuar vajzën ai është sulmuar fizikisht nga ish-vjehrri i tij, si dhe është ofenduar me fjalë.

Dëshmia e plotë:

Ka qenë në orën 15:20 minuta në banesën time në rrugën "Murat Toptani", rezidenca e familjes mbretërore Nr.6, Tiranë, për të takuar vajzën time të moshës 3-vjeçare, pasi me ish-bashkëshorten, shtetasen Elia Zogu, jemi në proces divorci. Unë fillimisht jam takuar me Shefin e administratës së Oborrit, shtetasin Syl Mulosmanaj, të cilin e kam pyetur në lidhje me një dollap që ishte boshatisur në kundërshtim me marrëveshjen.

Më pas unë i kam kërkuar Sylës që të më shoqëronte deri te vajza ime për ta takuar, për të cilën me një marrëveshje për zgjidhje martese kemi rënë dakord me ish-bashkëshorten.

Unë jam ngjitur sipër së bashku me Sylën edhe kam gjetur vajzen time të vogël, Geraldina Zogu, e moshës 3 vjeç, e cila ka qenë në shoqërinë e gjyshit të saj, babait të ish-bashkëshortes, shtetasit Gjergj Zaharia.

Në këto momente unë kam përqafuar vajzën time edhe shtetasi Gjergj Zaharia ka filluar me fjalë fyese e kërcënuese në drejtimin tim duke më thënë ti duhet të ndërrosh rrugën kur të më shikosh mua.

Reagimi im para kësaj situate ka qenë duke iu drejtuar Gjergjit që të mos më ofendojë e kërcënojë, sidomos në prani të vajzës edhe i kam kërkuar që ai të largohet nga dhoma ku unë po qëndroja me vajzën.

Në këto momente situata ka agravuar, shtetasi Gjergj Zaharia më është afruar duke më shtyrë e goditur me shkelma te këmbët e mia. Reagimi im ka qenë vetëm mbrojtës, por Gjergji ka vazhduar duke më goditur dhe më ka grisur xhupin, si edhe ka marrë edhe një send të fortë (statujë druri) me të cilin më ka goditur./CNA