72 orë stërvitje/ Regjimenti i këmbësorisë së jugut zgjedh Voskopojën

27 Shkurt 2024, 09:18, Aktualitet CNA

72 orë stërvitje/ Regjimenti i këmbësorisë së

Fshati turistik i Voskopojës është zgjedhur nga regjimenti i këmbësorisë së jugut për të zhvilluar një stërvitje malore. Zona e njohur si Kulet e Gjergjevicës, e cila ndodhet mes Lekasit dhe Voskopojës, është maja më e lartë e cila arrin në 1600 m. Stërvitja 72-orëshe e planifikuar nga ky regjiment, është dashur të kryhet në kushte të vështira atmosferike në këtë zonë, duke pasur si qëllim kalitjen e ushtarëve dhe përballimin me sukses të vështirësive. Kolonel Gëzim Marku, i cili është edhe komandant i regjimentit, ka treguar se është hera e parë që zhvillohet një stërvitje e këtij niveli në rajonin e Korçës.

“Ne jemi vendosur në Voskopojë për të zhvilluar një stërvitje 72-orëshe. Është hera e parë që regjimenti i këmbësorisë së jugut zhvillon një stërvitje në këtë nivel në këtë rajon. Nga muaji nëntor i vitit të kaluar, pas kalimit të forcave të armatosura në strukturën e re, dhe krijimit të regjimenteve të këmbësorisë së jugut, një batalion të tij e ka në rajonin e Korçës. Normalisht në programet e forcave të armatosura, ka stërvitje që janë të planizuara në kushte të vështira të motit, gjatë dimrit dhe gjatë verës. Këto stërvitje bëhen nga 24 deri 72 orë, plus stërvitje kompaksuese që shkojnë deri në 2 javë. Kjo stërvitje në fakt u realizua në këtë rajon me shpresë që të gjenim dhe pak dëborë, nuk pati dëborë por prapë kushtet ishin të vështira për shkak të motit me shi. Edhe kjo na shërben për t'u kalitur më mirë”, ka thënë koloneli.

Ndër të tjera ai thotë se ky regjiment ka pjesë të tij, dy nënreparte me trupa speciale që janë të deklaruara si pjesë e gatishmërisë së NATO-s dhe të BE-së.

“Një nga qëllimet dhe objektivat e kësaj stërvitjeje ishte dhe testimi i dy nënreparteve të deklaruara si të gatshme të NATO-s, një nënrepart është pjesë e batalionit të BE-së, dhe një tjetër pjesë e Forcave të Gatishmërisë së NATO-s", u shpreh ai.

Pjesë e forcave të armatosura prej 1 viti tashmë, është edhe 20-vjeçarja Sonja Bako. Pasioni për të qenë pjesë e FA ka bërë që ajo t'ia arrijë qëllimit, ndërsa e konsideron stërvitjen e sotme si një nga më të bukurat pavarësisht vështirësive të mëdha që pati.

"Unë jam Sonja Bako, jam ushtare e parë dhe jam në batalionin e parë të regjimentit të këmbësorisë së jugut. U jam bashkuar forcave të armatosura në vitin 2023 dhe e kisha si pasion të isha pjesë e FA. Më dukej një punë shumë interesante dhe për këtë arsye u bëra pjesë. Ka qenë një eksperiencë shumë e bukur, ka pasur shumë stërvitje të cilat na ndihmuan të ishim sa më aktivë si dhe të mësonim shumë gjëra që më parë nuk i dinim. Kishte vështirësitë e saj stërvitja sot për shkak të motit dhe kushteve atmosferike por pjesa tjetër ishte e përballueshme."/ CNA