KLSH i kërkon Bankës së Shqipërisë të përmirësojë mirëmbajtjen e stokut të parave, ja mangësitë

6 Dhjetor 2016, 10:53, Aktualitet CNA

Pas një inspektimi në Bankën e Shqipërisë, Kontrolli i Lartë i Shtetit ka identifikuar disa çështje në lidhje me procedurat e kontrollit mbi paranë, që kërkojnë përmirësime të mëtejshme.

Raporti që ka zbardhur për publikun Kontrolli i Lartë i Shtetit, ka vënë re mungesën e një sistemi të kompjuterizuar të regjistrimit të parave dhe përdorimit gjerësisht të formateve në Excel, për të mbajtur regjistrime të parave në arkat për veprim dhe stok. Kartëmonedhat, të cilat janë emetuar më parë dhe më pas janë rikthyer në arkë dhe janë paketuar nga punonjësit e Bankës, mbajnë etiketa vetëm me datën e paketimit, por pa një numër serial identifikimi, duke reflektuar një risk të lartë për t?u monitoruar gjatë këtij procesi, referon KLSH në raportin përmbledhës të kontrollit.

Institucioni më i lartë auditues në vend vëren se nuk ka praktika të njëjta lidhur me kufirin maksimal për gjendjen e parave të mbajtura në arkën qendrore për veprim, dhe për paratë e mbajtura nga degët.

?Ka nja nivel të lartë kartëmonedhash të paemetuara, të cilat janë printuar në vitet e mëparshme. Përafërsisht 43% e gjendjes aktuale, u takon kartëmonedhave të printuar midis viteve 2007 dhe 2012?, shprehet KLSH.

Gjithashtu grupi i inspektimit ka evidentuar mungesën e kontrolleve të përshtatshme mbi gjendjen e parasë dhe qarkullimin e saj, si dhe një metodologjie të mirëpërcaktuar në lidhje me këtë qarkullim, duke reflektuar rrezikun e qarkullimit të ulët të kartëmonedhave dhe duke ekspozuar bankën ndaj një rreziku më të madh të përvetësimit.

Kushtet fizike të arkave janë vlerësuar jo të përshtatshme, që mund të dëmtojë aftësinë e personelit për të kryer procedura kontrolli në kohë e të përshtatshme dhe kontrolle të vazhdueshme mbi gjendjen e parave të mbajtura në këto vendndodhje.

Gjithashtu KLSH vëren se ka mungesë të procedurave të rotacionit të detyrueshëm të personelit përgjegjës për vlerat monetare për të minimizuar rrezikun e bashkëpunimit në mashtrim, që rrjedh nga një numër i vogël i punonjësve të përfshirë në proces.

Pas gjetjeve, KLSH i rekomandon Bankës së Shqipërisë që të vlerësojë kërkesën për ndryshime në plotësimin e nenit 40 të Ligjit nr. 8269, datë 23.12.1997 ?Për Bankën e Shqipërisë?, lidhur me kontrollin mbi paranë, plotësime të cilat duhet të gërshetojnë në mënyrë efektive jo vetëm praktikat bazuar në rregullat që normojnë këtë proces në Bankën Qendrore Europiane dhe vendeve të Eurozonë por edhe kontekstin, kulturën dhe sistemet mbi të cilën realizohet ky proces në Shqipëri.