Ahmetaj në FMN dhe BB: Buxheti 2017, financim i reformave dhe rritje pagash e pensionesh

9 Tetor 2016, 12:27, Aktualitet CNA

Ministri i Financave Arben Ahmetaj gjatë viitës së tij në SHBA në kuadër të Takimeve Vjetore të Fondit Monetar Ndërkombëtar dhe Bankës Botërore ?Annual Meetings 2016?, ka deklaruar në injë prononcim telefonik për Topchannel se Shqipëria po konsolidon rritjen ekonomike.

“Ajo që është e rëndësishme në sytë e Fondit dhe të Bankës Botërore është konfirmimi i konsolidimit të rritjes ekonomike. Tashmë Shqipëria konsiderohet një vend me ekonomi që e ka lënë pas krizën e vitit 2008-2013 dhe ka hyrë në një rritje të konsoliduar dhe shifrat e fundit të rritjes ekonomike të botuara nga INSTAT e konfirmojnë trendin jashtëzakonisht të konsoliduar të rritjes ekonomike. Kjo na bën që gjithë negociatën që kemi me FMN përsa i përket komplet kuadrit makro të buxhetit të 2017 të kemi një avantazh duke iu referuar tashmë vërtetësisë së rritjes prej 3.4% të këtij viti dhe përshpejtimit të rritjes vitin tjetër.

Përsa i përket vitit tjetër të buxhetit, besoj se jemi afër dakordësisë për të financuar një sërë reformash, reformën në drejtësi, reformën territoriale, reformën në administratën publike dhe rritjen e pagave dhe të pensioneve duke ruajtur të gjithë ato parametra makrofiskalë që do të thotë uljen e borxhit publik me minimalisht 1% të prodhimit të brendshëm bruto dhe ruajtjen e një balance primare pozitive, pra përgjegjshmërinë e qeverisë për mos të krijuar asnjë cent borxh të ri. Kjo do të thotë që në 20 vite, në një vit elektoral, qeveria është tejet e përgjegjshme jo vetëm që te ruaj kuadrin fiskal, të ruajë borxhin, të mos krijojë asnjë cent borxh të ri, të rrisë ekonominë por mbi të gjitha, të financojë reformat dhe të rrisë dhe pagat e pensionet”, u shpreh ministri i Financave Ahmetaj.

Ministri prezantoi në Selinë Qendrore të Bankës Botërore, ecurinë e ekonomisë shqiptare në tre vitet e fundit, zhvillimet kryesore dhe reformat e ndërmarra nga qeveria shqiptare.

Në takim i pranishëm ishte Patrizio Pagano, Drejtor Ekzekutiv për Ballkanin, Italinë, Greqinë dhe Maltën; Ellein Goldstein Drejtore Rajonale për Europën Juglindore; Guvernatori i Bankës së Shqipërisë Gent Sejko, Shefja e Misionit të FMN në Shqipëri si dhe përfaqësues të institucioneve financiare ndërkombëtare.

Pagano theksoi se qeveria shqiptare ka ndërmarrë reforma të thella strukturore të cilat kanë mundësuar rigjallërimin e rritjes ekonomike, uljen e risqeve fiskale dhe stabilizimin e financave publike.

Ministri i Financave Arben Ahmetaj mbajti prezantimin me temë ?Shqipëria, përforcimi i rritjes përmes reformave të thella dhe bashkëpunimit rajonal?. Ai pasqyroi zhvillimet e ekonomisë shqiptare në tre vitet e fundit, me fokus të vecantë konsolidimin e financave publike dhe reformat strukturore të cilat kanë bërë të mundur rimëkëmbjen e aktivitetit ekonomik, të reflektuar në uljen e papunësisë dhe shtimin e konsumit e investimeve private. /Citynews.al