Oborri i servilëve mediatik të Kryeministrit nuk mbaron me Henri Çilin

5 Tetor 2016, 08:13, Aktualitet CNA

Një nga anëtarët më të devotshëm është edhe Carlo Bollino, ish-pronar i Balkanweb/News24/Gazetës Shqiptare dhe aktualisht pronar i ReportTV dhe Shqiptarja.com. Ndryshe nga z. Çili, lidhjet e z. Bollino me KM Rama janë të hershme, që nga koha kur ai drejtonte Bashkinë e Tiranës. Por devotshmëria që ata shfaqin ndaj pushtetit të KM është i ngjashëm.

Në një shkrim të tijin për revoltën që ka shkaktuar ligji i mbetjeve, z. Bollino mbështeste tezën e hedhur nga KM Rama se Qeveria nuk kishte bërë sa duhet për të informuar publikun. Z. Bollino shkonte dhe më tej duke thënë se Qeveria duhet të ndërmerrte fushata informimi publik, duke blerë hapësirë reklamuese në media. Argumenti është qesharak, i turpshëm dhe tallje me publikun.

E para, z. Bollino tani shfaqet i paftyrë në kërkimin e fondeve publike duke përdorur edhe një moment të vështirë politik. Të mësuar me përfitime të ndryshme nga pushteti për pronarët e mediave, kjo është gjithsesi një risi në mënyrën a hapur dhe publike se si tashmë kërkohet. Kujtojmë që z. Bollino është përfitues i shpeshte i fondeve publike për projekte të ndryshmë në fushën e kulturës si psh BunkArt dhe Shtëpia e Gjetheve.

Pjesa tjetër e argumentit është akoma më qesharake. Z. Bollino supozon se në fakt Qeveria ka dashur, po nuk ka ditur, si të informojë publikun. Kjo është komplet e gënjeshtërt. Në fakt ligji ka kaluar me procedurë të parregullt duke shkelur disa hapa për informim publik rreth një çështje mjedisore, siç e kërkon Konventa e Arhusit e ratifikuar nga parlamenti shqiptar. Ligji është futur në komisione parlamentare gjatë kohës së verës, ka kaluar me një mbledhje të vetme dhe është miratuar me diskutime të pakta në seancë. Deri në momentin e miratimit ligji nuk ishte publik e akoma nuk janë publikuar disa pjesë të tij. Pra Qeveria në mënyrë aktive NUK KA DASHUR të informojë publikun. E ka bërë me qëllim të plotë, e zakoniksht kjo nuk ndodh për arsye të mira.

Të thuash sot se problemi i ligjit është thjesht një shkujdesje në marrdhëniet publike është poshtërim ndaj publikut. Dhe meqë KM Rama nuk mundet ta thotë shpesh këtë argument, servilat mediatik si z. Bollino janë të gatshëm të japin ndihmën e tyre. Z. Bollino dhe mediat e tij janë shembulli më i mire se si pushteti ka blerë pushtetin e katërt në vend dhe sot media shërben vetëm si një pjesë e propagandës qeveritare./Ne Shqiperia