Aleanca Kundër Importit të Plehrave proteston kundër ligjit për importin e plehrave

20 Shtator 2016, 07:03, Aktualitet CNA

Aleanca Kundër Importit të Plehrave ka nisur dje rreth orës 17:40 protestën kundër vendimit për të importuar plehrat nga vendet e tjera. Ambientalistët kanë deklaruar se do të protestojnë përsëri para Parlamentit në seancën e 22 shtatorit, kur ligji pritet të miratohet në Kuvend.

Pasi qëndruan për afro një orë te Piramida, protestuesit prej dhjetëra personash iu drejtuan selisë së Parisë Socialiste, ku ishte duke u zhvilluar mbledhja e Kryesisë. Vendimi për importimin e plehrave në vendin tonë pritet të shqyrtohet së shpejti në Kuvend. Në vitin 2013 ndodhi anulimi i ligjit për importin e mbetjeve, por tashmë socialistët e rikthejnë me alibinë e falimentimit të industrisë ricikluese në vend.

Andi Tepelena, ambjentalist dhe bashkë-themeluesi i Aleancës Kundër Importit të Plehrave, ka shprehur qëndrimin e tij kundër importimit të mbetjeve për në vendin tonë. Tepelena ka qenë nismëtar i AKIP që prej vitit 2012, kur është bërë edhe referendumi për refuzimin e importit të mbetjeve, i nënshkruar me mbi 65 mijë firma. Në të njëjtën linjë me të qëndron edhe ambjentalisti tjetër, Ladvosh Ferruni si dhe aktivistja e shoqërisë civile Kozara Kati. ?Problematikat janë të shumta, duke nisur që nga moskonsultimi me grupet e tjera të interesit siç e parashikon ligji siç janë: Ministria e Bujqësisë, Ministria e Turizmit, Ministria e Shëndetësisë, Organizatat e Shoqërisë Civile që mbulojnë fushën e mjedisit, turizmit, shëndetit dhe bujqësisë. Nuk dihet se sa është sasia e mbeturinave që gjeneron Shqipëria, apo ndarjen sipas materialeve të riciklueshme dhe jo të riciklueshme. Sa është numri i kompanive ricikluese në vend dhe kapaciteti total i riciklimit që këto kompani kanë. Thuhet se janë investuar 40 mil euro, një burim tjetër thotë 120 milionë, dhe një i tretë flet për 245 milionë. Askush nuk e di se kush është shifra reale. Edhe për shifrat e të punësuarve, ku specifikohet që kjo industri ka rreth 35.000 të punësuar, por nuk specifikohet a janë këta të punësuar të regjistruar apo mbledhës informalë nëpër koshat e mbeturinave anembanë Shqipërisë? Rrezikojmë seriozisht të kthehemi në një kosh plehrash, ndaj mendoj se të gjithë duhet të reagojmë për të ndalur miratimin e këtij ligji?, ka thënë Tepelena në një prononcim për gazetën ?SOT?. Ndërkohë Kozara Kati thotë se duhet një reagim më i madh. ?Reagimi në vitin 2013 nga shoqëria ishte më i madh, ndaj nisma u bllokua. Duhet bërë përsëri e njëjta gjë sa nuk është vonë?, thotë Kozara Kati. /Citynews.al