Viti historik për Kombëtaren/ Rekorde dhe kualifikim, sytë nga... marsi

1 Janar 2026, 09:39, Sport CNA

Viti historik për Kombëtaren/ Rekorde dhe kualifikim, sytë nga...

Shqipëria la pas një vit shumë të rëndësishëm në historinë e saj sportive, i cili u kurorëzua me kualifikimin për herë të parë në “Play Off” të Kupës së Botës.

Një arritje që vjen pas një rruge jo të lehtë, sidomos në fillim të vitit, kur Kombëtarja vinte nga paraqitje zhgënjyese në Ligën e Kombeve dhe pritshmëritë ishin të ulëta për shkak edhe të shortit të vështirë.

Rrugëtimi i kuqezinjve nisi me një transfertë të vështirë në “Uembli” ndaj Anglisë. Shqipëria u mund, por zhvilloi një paraqitje të mirë përballë një kundërshtari superior.

Në ndeshjen e dytë, Kombëtarja bëri detyrën në Tiranë duke mundur Andorrën me rezultatin 3-0. Gjatë gjithë fushatës, Anglia mbeti e vetmja skuadër që arriti ta mposhtë Shqipërinë, si në ndeshjen e parë, ashtu edhe në atë të fundit, e cila u zhvillua pa shumë peshë në renditje, pasi objektivat ishin arritur.
Një nga momentet kyçe të kualifikueseve ishte përballja me Serbinë.

Pas barazimit në Tiranë dhe penalltisë së humbur nga Rei Manaj, që u diskutua gjatë, Shqipëria arriti një fitore historike në transfertë, në Leskovc. Goli i Manajt në fundin e pjesës së parë i dha Shqipërisë tre pikë shumë të rëndësishme, që ndryshuan rrjedhën e grupit dhe e vendosën fatin e kualifikimit në duart e vetë skuadrës.

Ajo fitore shënoi edhe triumfin e parë sportiv të Shqipërisë ndaj Serbisë në fushën e lojës.
Kualifikimi u vulos përfundimisht në Andorra, ku Shqipëria fitoi me rezultatin 0-1 falë golit të Kristjan Asllanit. Në të njëjtën kohë, humbja e Serbisë ndaj Anglisë në Londër bëri që Shqipëria të siguronte matematikisht vendin e dytë në grup, duke u kualifikuar për herë të parë në “Play Off” të Kupës së Botës, me 14 pikë të grumbulluara.

Viti 2025 u mbyll me vetëm dy humbje për Kombëtaren, të dyja ndaj Anglisë. Shqipëria regjistroi edhe një seri rekord prej pesë fitoresh radhazi, diçka që nuk ishte arritur kurrë më parë. Në aspektin individual, Elseid Hysaj u bë lojtari me më shumë paraqitje në historinë e Kombëtares, duke kaluar rekordin e Lorik Canës dhe duke e mbyllur vitin me 96 ndeshje me fanellën kuqezi.

Rezultatet pozitive u reflektuan edhe në renditjen e FIFA-s, ku Shqipëria pati luhatje gjatë vitit, por e mbylli 2025-ën në vendin e 63-të. Në fund të vitit, Federata vendosi të rinovojë kontratën e trajnerit Silvinjo deri në përfundimin e ndeshjeve të “Play Off”-it, me mundësi vazhdimi në rast kualifikimi. Shqipëria hyn kështu në muajt vendimtarë të marsit, me synimin për të hedhur hapin më të madh në historinë e saj futbollistike.