web counter
LEXO PA REKLAMA!

SHKARKO APP

App Store
Google Play

Miura vazhdon me futbollin e luajtur, skuadër e re në moshën 59-vjeçare

30 Dhjetor 2025, 15:28, Sport CNA

Miura vazhdon me futbollin e luajtur, skuadër e re në moshën

Kazuyoshi Miura ka konfirmuar se nuk ka ndërmend të ndalë karrierën e tij futbollistike, pavarësisht se në shkurtin e ardhshëm do të mbushë 59 vjeç.

Japonezi ka bërë të ditur se do të vazhdojë të luajë, duke u transferuar në formë huazimi te Fukushima United, një klub japonez që militon në kategorinë e tretë të futbollit vendas.

Miura, i njohur në Japoni me nofkën “Re Kazu”, ka theksuar se motivimi dhe pasioni për futbollin mbeten të pandryshuara, pavarësisht moshës. Sezonin e kaluar ai ishte pjesë e Atletico Suzuka, një klub i kategorisë së katërt japoneze, me të cilin zhvilloi shtatë ndeshje. Në fund të sezonit, skuadra u rrëzua në kampionatin rajonal, por kjo nuk ndikoi në vendimin e lojtarit për të vazhduar aktivitetin.

Në vitin 2024, Miura u rikthe në Japoni pas një eksperience në Portugali, ku luajti për Oliveirense, skuadër e kategorisë së dytë. Edhe atje ai ishte aktivizuar në formë huazimi nga Yokohama, klubi që mban të drejtat e kartonit të tij.

Karriera e Miurës ka nisur në vitin 1986 me klubin brazilian Santos. Më pas ai ka luajtur në disa kampionate dhe vende të ndryshme, përfshirë Japoninë, Italinë, Kroacinë dhe Australinë, duke u bërë një nga futbollistët japonezë me eksperiencën më të gjerë ndërkombëtare.

Në nivel përfaqësuesesh, Miura debutoi me kombëtaren japoneze në vitin 1990. Ai numëron 89 paraqitje dhe 55 gola, duke qenë një nga emrat më të rëndësishëm të futbollit japonez të viteve ’90.





Lajmet e fundit nga