Silvinjo: Ja lojtari spanjoll që do ta doja te Shqipëria

29 Dhjetor 2023, 14:03, Sport CNA

Silvinjo ka dhënë një intervistë në Marca sa i përket suksesit te Shqipëria. Por ndryshe nga më parë, trajneri brazilian ka prekur edhe një temë shumë interesante. Flitet pikërisht për lojtarët e rinj që kanë ende dyshime në zgjedhjen e Kombëtares dhe për këto raste, Silvinjo ka ide të qarta.

-Si përfundoi Silvinjo në Shqipëri?

Ndodhi gjatë një darke në Milano, e kuptova se bëhej fjalë për një ofertë të mirë në të gjitha termat. Më pas udhëtova në Tiranë dhe më pëlqeu. Filluam të punonim si të çmendur, aq shumë sa vetëm para pak kohësh zbulova bukurinë e papërshkrueshme të jugut. Nuk do ta kisha imagjinuar që do të punoja në Shqipëri, por bota e futbollit i ka këto. Ka raste kur firmos një kontratë pesëvjeçare dhe largohesh që në vitin e parë, e po ashtu ka raste kur firmos për një vit dhe qëndron për shumë vite.

-Çfarë dinit për futbollin shqiptar para se të punonit atje, apo edhe për gjuhën shqipe?

Për futbollin dija shumë pak, por shpejt kuptova se projekti ishte i duhuri. Mbërrita në Tiranë dhe pashë se gjithçka ishte gati, strukturat ishin perfekte. Pastaj shumë lojtarë të kombëtares janë pjesë e Serisë A apo e ligave më të rëndësishme në Evropë. Pse të mos e pranoja ofertën?! Nuk kishte arsye për të thënë jo.

Sa i përket gjuhës shqipe ajo është shumë e vështirë, por nuk është se na duhet një përkthyes. Aty të gjithë dinë italisht apo anglisht. Komunikimi me lojtarët është shumë i lehtë.

-Si është një ditë punë e zakonshme?

Jam me Dorivën që ka qenë një lojtar i Celta Vigos dhe me Zabaletën. Ai lëviz më shumë mes Tiranës dhe Barcelonës. Punojmë shumë, shkojmë në Federatë dhe më pas në hotel për të ndjekur ndeshjet e lojtarëve. Ushqimi pastaj është shumë i shijshëm, kështu kanë kaluar këta 10 muajt e fundit, por jam shumë i lumtur. Nëse të pëlqen futbolli atëherë e shijon edhe këtë jetë.

-Ndjesia e përballjes me Spanjën, Italinë dhe Kroacinë në "Euro 2024"?

Në këta gjashtë muaj ne do të punojmë si të çmendur, është një ëndërr më vete fakti që jemi në Europian. Por, duam më shumë, lojtarët kërkojnë më shumë. Do të testojmë veten për të kuptuar cilët jemi, është e qartë se bëhet fjalë për një grup shumë të vështirë, por do të mundohemi.

-Cilin lojtar do t’ia merrnit Spanjës?

Vetëm njërin. Spanja ka shumë, por unë zgjedh vetëm njërin prej tyre. E kam fjalën për Rodrin, është pikë referimi për Spanjën dhe për City-n. Është një futbollist i madh.

-Keni folur shpesh për Botërorin, kërkoni të jeni trajneri i parë që dërgon Shqipërinë në një Kupë Bote?

Futbolli më ka mësuar se gjithçka lëviz shumë shpejt. Dua të punoj dhe t’i bëj gjërat mirë, por nuk e di për sa kohë. Dua që skuadra të mësohet me kompeticionet dhe garën. Dua që njerëzit të thonë se Shqipëria është një kundërshtar i vështirë. Duhet të jemi të bashkuar dhe të luajmë me zemër, kështu u kualifikuam në Europian. Ta shohim çfarë do të rezervojë e ardhmja.