Rregulli i veçantë/ Me barazim pikësh “digjet” Interi, finalja Milan-Napoli për titullin

23 Mars 2026, 20:06, Sport CNA

Rregulli i veçantë/ Me barazim pikësh “digjet”

Gara për vendet e para në Serinë A mbetet e hapur dhe me skenarë të ndryshëm në javët e fundit të sezonit. Aktualisht, Interi kryeson renditjen me 6 pikë më shumë se Milani dhe 7 më shumë se Napoli, ndërsa në dispozicion janë edhe 8 ndeshje, që përkthehen në maksimumi 24 pikë të mundshme.

Në këtë situatë, ekziston edhe mundësia që tre skuadrat kryesore, Inter, Milan dhe Napoli, të mbyllin sezonin me pikë të barabarta në vendin e parë.

Në një rast të tillë, rregullorja parashikon përdorimin e klasifikimit të veçuar bazuar në ndeshjet direkte mes tyre. Skuadra që renditet e treta në këtë mini-klasifikim përjashtohet, ndërsa dy të parat luajnë një ndeshje vendimtare për titullin.

Duke iu referuar rezultateve aktuale mes këtyre skuadrave, Milani kryeson me 9 pikë, Napoli ka 4, ndërsa Interi vetëm 1 pikë. Kjo do të thotë se, në rast barazimi pikësh, Interi do të mbetej jashtë dhe titulli do të vendosej në një përballje direkte mes Milanit dhe Napolit. Sipas rregullit aktual, ndeshja do të zhvillohej në fushën e skuadrës më të renditur mes dy të parave, që në këtë rast do të ishte “San Siro”.

Edhe në skenarë të tjerë me dy skuadra në barazim, vendndodhja e ndeshjes ndryshon. Nëse në vendin e parë do të ishin Napoli dhe Interi, ndeshja do të luhej në stadiumin “Maradona”. Nëse do të ishin Milan dhe Inter, ndeshja do të zhvillohej në “San Siro”, me organizimin e klubit kuqezi.

Në historinë e Serisë A, një ndeshje e tillë është zhvilluar vetëm një herë, në vitin 1964, kur Bolonja fitoi 2-0 ndaj Interit. Formula e ndeshjes vendimtare ishte hequr në sezonin 2005-2006 dhe është rikthyer sërish duke nisur nga sezoni 2022-2023.

Ndërkohë, për zonën Champions League nuk parashikohet e njëjta situatë. Në rast barazimi pikësh, renditja përcaktohet nga rezultatet direkte.

Në këtë aspekt, Komo ka avantazh me 7 pikë ndaj Juventusit dhe Romës, të cilat kanë nga 4 pikë. Kjo do të thotë se Como do të siguronte kualifikimin në Champions Ligë në rast barazimi me këto skuadra.

Në një analizë të rezultateve direkte mes gjashtë skuadrave të para, Milani rezulton në vend të parë me 18 pikë në 8 ndeshje dhe diferencë golash 10-4.

Napoli ndjek me 12 pikë dhe golavarazh 11-11, ndërsa Como ka 11 pikë me diferencë 8-10. Interi dhe Juventusi kanë nga 10 pikë, ndërsa Roma 6 pikë.