Ndryshime në formacion, si pritet të luajë Shqipëria ndaj Ukrainës

31 Mars 2026, 09:44, Sport CNA

Ndryshime në formacion, si pritet të luajë Shqipëria ndaj

Kombëtarja shqiptare është gati për ndeshjen miqësore ndaj Ukrainës, e cila do të luhet mbrëmjen e kësaj të marte në Valencia. Trajneri Silvinjo pritet të bëjë disa lëvizje në formacion, kryesisht në repartin ofensiv, për të testuar alternativa të reja, pas humbjes ndaj Polonisë.

Në sulm, nga minuta e parë pritet të aktivizohen Armando Broja dhe Anis Mehmeti. Broja u përdor si zëvendësues në ndeshjen e fundit ndaj Polonisë, ndërsa Mehmeti qëndroi në stol gjatë gjithë takimit.

Për këtë sfidë, Mehmeti parashikohet të vendoset në krahun e majtë të sulmit, ndërsa Broja në qendër, si pikë referimi për fazën sulmuese.

Në krahun e djathtë të repartit ofensiv pritet të konfirmohet Myrto Uzuni, i cili luajti në këtë pozicion edhe në ndeshjen e fundit. Këto ndryshime vijnë edhe si pasojë e mungesave në repartin ofensiv.

Ernest Muçi nuk do të jetë i disponueshëm për këtë ndeshje, pasi ka pësuar një dëmtim në kofshën e djathtë. Problemi u konfirmua pas ekzaminimeve me rezonancë magnetike dhe lojtari është larguar nga grumbullimi për të vijuar rikuperimin pranë klubit të tij, Trabzonspor.

Mungesa e tij redukton opsionet në sulm dhe rrit mundësinë për aktivizimin e lojtarëve të tjerë nga minuta e parë.

Në repartin e mbrojtjes nuk priten ndryshime të shumta. Në portë do të jetë Thomas Strakosha. Në krahun e majtë të mbrojtjes pritet të aktivizohet Stavro Pilo, ndërsa në qendër do të jetë kapiteni Berat Gjimshiti, i shoqëruar nga një mes Cakes dhe Pllanës. Në të djathtë të mbrojtjes do të luajë Ivan Balliu, në vend të Elseid Hysajt.

Edhe në mesfushë pritet të ruhet struktura e zakonshme, me Kristjan Asllanin, Qazim Laçin dhe Juljan Shehun që pritet të marrin minuta nga fillimi. Kjo treshe synon të garantojë ekuilibër mes fazës mbrojtëse dhe ndërtimit të lojës.

Kjo ndeshje miqësore shërben si një test për stafin teknik pas angazhimeve zyrtare, duke u dhënë mundësi disa lojtarëve të fitojnë minuta dhe të tregojnë formën e tyre në kushte gare.

Përballja ndaj Ukrainës do të zhvillohet në Valencia, duke nisur nga ora 20:45.