web counter
LEXO PA REKLAMA!

SHKARKO APP

App Store
Google Play

Drejtori dhe këshilltarët duhet t’u kthejnë paratë shqiptarëve/ Kryeministri duhet t’i çojë para drejtësisë

11 Korrik 2025, 13:29, Politikë REDAKSIONALE

Drejtori dhe këshilltarët duhet t’u kthejnë paratë

“Një drejtor ujësjellësi me 30 këshilltarë”, deklaron kryeministri Rama. Nuk është parë në fakt e nuk është dëgjuar.

Zullumet tek Ujësjellësi i Tiranës thjesht dhe vetëm janë shtuar. Edhe pse para disa kohësh mediat nxorën emra gazetarësh, bashkëshorte gazetarësh, personazhe publike etj., që punonin si drejtorë, specialistë, këshilltarë etj., në Ujësjellësin e Tiranës mesa duket zullumi qenka shtuar. Askush nuk ka vënë mend. Sërish njerëz me influencë nga politika, në media janë parkuar si këshilltarë në UKT.

Kuptohet që janë qoka të kryebashkiakut të Tiranës, Erion Veliaj, se një drejtor Ujësjellësi nuk ka shans të marrë dot 30 këshilltarë për interesat e tij.

Tani jemi përballë dy fakteve, denoncimeve që kanë ndodhur vite më parë dhe që janë bërë publike ndërkohë që situata është përkeqësuar.

Herën e parë gjithçka u la me zhurmën mediatike, ndërsa tani nuk mund të mbetet e tillë.

Drejtori aktual, Skerdi Drenova, prej kohësh po sulmohet në media. Sapo ka marrë detyrën mesa duket ka filluar të heqë këshilltarë apo qokat e kryebashkiakut, ka filluar të shkurtojë strukturat dhe kanë filluar sulmet, akuzat deri në më perverset, të gjitha të pavërteta.

Të vërtetën e madhe sot na e tha kryeministri, i cili theksoi se ishin 30 këshilltarë në UKT.

Ndërkohë që performanca e këtij institucioni është skandaloze, me humbje.

Qytetarët s’kanë ujë. Njerëz që paguhen pak dhe punojnë shumë, njerëz që paguhen shumë dhe nuk punojnë fare. Kjo është situata.

Ndaj dhe përtej së parës, që është kthimi i çdo qindarke që kanë marrë si pagë këta njerëz që kanë bërë sikur kanë punuar apo këta 30 këshilltarë që nuk kanë shkuar kurrë në zyrë, drejtuesit që i kanë emëruar, ata që i kanë emëruar dhe firmosur apo dhe ata që i kanë urdhëruar duhet të shkojnë përballë drejtësisë.

Është një shpërdorim i pastër i taksave të qytetarëve të Tiranës. Është një shpërdorim detyre nga të gjithë ata që i kanë emëruar dhe paguar e i kanë përdorur paratë e taksapaguesve për qoka, për të mbajtur në punë njerëz që nuk punojnë dhe për të keqpaguar ata punonjës të shkretë, të cilët ende me kazmë hapin kanale apo hidraulikë të thjeshtë që paguhen për një copë bukë të cilët në pikun e diellit, në shi, në dëborë janë në dispozicion për të riparuar defektet.

Ndaj dhe sot jemi përballë asaj që sa vërtetë e ka kryeministri, a do të çohen të gjithë këta persona, që nga ata që i kanë emëruar e deri tek ata që i kanë marrë paratë përpara drejtësisë?

Për t’u thënë shqiptarëve që këtë herë vërtetë nuk është shaka si vite më parë kur dolën një tufë emrash. Ndërsa sot pa dalë emra mjafton struktura për të kuptuar shkeljen e ligjit që nga shpërdorimi i detyrës dhe keqpërdorimi i fondeve publike./ CNA





Lajmet e fundit nga