Pse stresi shkakton rënien e flokëve?

2023-02-25 09:12:00, Shëndeti CNA

Thinja e flokëve është një pjesë normale e plakjes, por disa faktorë të stilit të jetesës apo gjendje shëndetësore mund të shkaktojnë një rënie të papritur ose graduale të flokëve. Stresi dhe humbja e flokëve gjithashtu mund të kenë lidhje midis tyre, sidomos nëse një person përjeton nivele të larta stresi.

Në këto raste, një person mund të vërejë se më shumë flokë po i bien sesa po i dalin sërish. Nga kjo gjë mund të preken si burrat ashtu edhe gratë. Ndërsa shumë nga lloj rëniesh të lidhura me stresin janë të përkohshme, cilido që vëren rënie të papritura apo në masë të flokëve, duhet të bisedojë sa më parë me mjekun e familjes.

Sepse kjo dukuri mund të nënkuptojë ndonjëherë një gjendje shëndetësore themelore, e cila mund të ketë nevojë për trajtim mjekësor. Stresi është çdo lloj ndryshimi që shkakton tendosje fizike, emocionale ose psikologjike. Të gjithë ne përjetojmë stres në një farë mase në momente të caktuara të jetës.

Por stresi afatgjatë ose intensiv, mund të ketë efekte më të rënda në tru dhe trup. Stresi kronik ka qenë prej vitesh i lidhur me rënien e flokëve, por deri vonë studiuesit nuk e kishin kuptuar plotësisht arsyen. Në vitin 2021, në revistën “Nature” u botua një studim mbi minjtë, që zbuloi një mekanizëm të mundshëm shkakësor.

Studiuesit i nënshtruan minjtë ndaj stresit, gjë që u rriti nivelet e kortizolit, hormonit të stresit. Nivelet më të larta të kortizolit, nënkuptonin që folikulat e flokëve të minjve mbetën në një fazë pushimi të zgjatur, pra ato mbetën joaktive. Kur ndodh kjo e fundit, qimet nuk u rriten, megjithatë minjtë vazhduan të humbnin qimet e trupit me një shpejtësi normale.

Rritja e nivelit të kortizolit i pengoi qelizat nën folikulën e flokëve (papilla e lëkurës) të sekretonin i një molekule të quajtur GA56. GA56 aktivizon qelizat staminale të folikulit të flokëve, duke inkurajuar rritjen e qimeve të reja.

Për shkak se studimi u krye tek minjtë, nuk është e qartë nëse të njëjtët mekanizma shpjegojnë arsyen pse stresi mund të çojë në rënien e flokëve tek njerëzit. Por është e qartë se ekziston një lidhje midis stresit dhe rënies së flokëve, thotë Eva Praudman, specialiste në sëmundjet e lidhura me flokët në Britaninë e Madhe.

Një stresi i gjatë në kohë apo shumë intensiv në shkallën e tij, mund të shkaktojë edhe reagimin e tepërt të sistemit imunitar, duke kontribuar në rënien e flokëve, thekson më tej Praudman. Sipas një rishikimi të vitit 2020 në Gazetën Qendrore të Evropës së Imunologjisë, Alopecia Areata është një lloj rënie e flokëve ku sistemi imunitar i një personi sulmon folikulat e flokëve.

Pse stresi shkakton rënien e flokëve?

Autorët e studimit theksuan se faktorët mjedisorë, si stresi, mund ta shkaktojnë atë reagim. Po si ndikon stresi në ciklin e flokëve? Rritja e flokëve ndodh në një cikël të përbërë nga disa faza të ndryshme. Në çdo kohë, fijet e flokut në kokën e një personi janë në faza të ndryshme. Sipas një studimi të vitit 2017 në revistën “Clinical, Cosmetic and Investigational Dermatology 4 janë fazat e dallueshme.

1. Anagen ose faza e rritjes.

90 për qind e folikulave janë në këtë fazë në çdo kohë, dhe kjo mund të zgjasë deri në 6 vjet përpara se të hyjë në fazën tjetër. Në këtë fazë, gjëndrat e flokëve nxisin vazhdimisht daljen e flokëve të reja që vazhdojnë të rriten derisa të priten ose të bien.

2. Catagen ose faza e tranzicionit.

Në këtë fazë të shkurtër 10-ditore, folikulat e flokëve tkurren pasi ndërpritet furnizimi me gjak i qelizave, duke e ngadalësuar rritjen e flokëve. Rreth 1 për qind e folikulave janë në këtë fazë.

3. Telogjeni ose faza e pushimit.

Rreth 9 për qind e folikulave janë në këtë fazë dhe ajo zgjat rreth 3 muaj. Gjatë kësaj faze, gjëndrat e flokëve mbeten joaktive.

4. Ekzogjeni ose faza e rënies.

Kjo është faza përfundimtare në të cilën bien fije floku të caktuara

Kur stresi shkakton një ndërprerje të këtij cikli, më shumë fije floku zhvendosen në fazën telogjene, duke shkaktuar një shtim të rënies së flokëve dhe rrallimit të përgjithshëm, thekson Praudman. Por a mund të rifitohen flokët e humbur për shkak të stresit?

Ekspertja Prauman thotë se me kalimin e kohës është e mundur të rikthehen mbrapsht shumë procese të humbjes së flokëve për shkak të stresit. Por është e rëndësishme të kërkoni udhëzime nga një mjek, sepse rënia e flokëve mund të shkaktohet nga disa gjendje mjekësore më serioze.

Ekspertët thonë se trajtimet për humbjen e flokëve të shkaktuar nga stresi, mund të përfshijnë ndryshime në stilin e jetës ose dietën, si dhe terapi me lazer të nivelit të ulët në lëkurën e kokës, gjë që mund të ndihmojë në stimulimin e folikulave në një cikël të shëndetshëm rritjeje.

Përkthyer nga CNA.al