E fundit!

19:46 Politikë

“Këshilli Kombëtar, kozmetikë e Berishës”/ Spaho: PD do e ketë të pamundur të jetë rivale e PS

Ish-nënkryetari dhe ish-deputeti i PD-së Edmond Spaho ka k...

Bien depozitat në lekë në mars për të dytin muaj radhazi, efekti nga korporatat

29 Prill 2026, 22:48, Ekonomi CNA

Bien depozitat në lekë në mars për të dytin muaj

Ndryshe nga muaji janar, që pa një rritje rekord të kursimeve në monedhën vendase, të ndikuara nga bizneset private dhe institucionet publike, shkurti dhe marsi kanë shënuar rënie të tyre, ndërsa dhe valuta ka pasur ecuri të dobët.

Sipas të dhënave të Bankës së Shqipërisë, në fund të marsit, depozitat në lekë të individëve, bizneseve e institucioneve të tjera në banka kanë arritur në 727 miliardë lekë, duke u ulur me 6 miliardë lekë (-0.8%), në krahasim me muajin e mëparshëm.

Në janar, kursimet në banka kishin shënuar një rritje rekord me bazë mujore prej 26 miliardë lekësh, ndërsa në shkurt ranë me 4.3 miliardë lekë.

Me bazë vjetore (mars 2026/mars 2025), kursimet në monedhën vendase janë shtuar me 81.4 miliardë lekë, ose 12.6%.

Rënia e marsit, ashtu si dhe ajo e shkurtit është ndikuar nga tkurrja e kursimeve të bizneseve, (-6.8 miliardë lekë), pas rritjes së fortë që shënoi ky zë në janar, i ndikuar nga pagesat e fund vitit nga buxheti i shtetit për kompanitë e punëve publike.

Depozitat në lekë të individëve shënuan një rritje të lehtë në mars.

Ndryshe nga depozitat në lekë që ishin me rënie, ato në valutë shënuan një rritje të lehtë, duke arritur në 8.76 miliardë euro, me një zgjerim prej 35 milionë euro. Me bazë vjetore, kursimet në monedhën e përbashkët janë rritur me 758 milionë euro, ose 9.5%.

Banka e Shqipërisë e raporton stokun e kursimeve totale në lekë dhe euro të konvertuara në monedhën vendase, që në fund shkurtit zbriti në 1.49 trilionë lekë, nga rreth 1.5 trilionë lekë (mbi 15 miliardë euro), që ishte në fund të shkurtit, i ndikuar si nga rënia e kursimeve në lekë, ashtu dhe efekti i kursit të këmbimit të depozitat në euro.

Në një vit, nga marsi 2025 deri në mars 2026, depozitat në sistemin bankar (të konvertuara në euro) janë shtuar me rreth 1.6 miliardë euro, ku ndikimin më të madh, me rreth 52% të rritjes, e ka dhënë monedha vendase./Monitor.al