web counter
LEXO PA REKLAMA!

SHKARKO APP

App Store
Google Play

E fundit!

x

Sesioni i ri parlamentar/ Begaj, thirrje deputetëve: Mbështesni institucionet e drejtësisë  

2 Shtator 2024, 11:08, Aktualitet CNA
Sesioni i ri parlamentar/ Begaj, thirrje deputetëve: Mbështesni
Bajram Begaj, Presidenti i Shqipërisë

Në një mesazh drejtuar Kuvendit të Shqipërisë me rastin e rastin e çeljes së sesionit të ri, Presidenti i Republikës, Bajram Begaj, u bën thirrje deputetëve të fokusohen në anëtarësimin e Shqipërisë në Bashkimin Evropian, si dhe në luftën kundër krimit dhe korrupsionit.

Begaj kërkoi që partitë politike të angazhohen në një dialog të frytshëm dhe në nisma ligjore të bazuara në shqetësimet e qytetarëve.

"Ne duhet të sigurojmë që çdo ligj që miratohet të jetë në përputhje me interesat e qytetarëve dhe me standardet më të larta demokratike. Kjo kërkon angazhim të përbashkët dhe përpjekje të vazhdueshme për të siguruar që Kuvendi të jetë gjithmonë i përkushtuar dhe të përmbushë rolin e tij mbikëqyrës, të garantojë balancën e pushteteve, si dhe të mbrojë interesat e popullit”, shprehet Presidenti Begaj në mesazhin drejtuar Kuvendit.

Në një kohë kur kjo legjislaturë po shkon drejt fundit dhe po afron viti elektoral, Presidenti i Republikës vlerëson se deputetët duhet të ushtrojnë me përgjegjësi mandatin në këtë drejtim, pasi, sipas tij, “po afron edhe momenti për të peshuar arritjet e sukseset, mangësitë dhe dështimet, për të vlerësuar vetveten, por dhe për t’u vlerësuar nga publiku.

“Në këtë shtator të ri, imazhi dhe performanca parlamentare janë sa të dëshiruara, aq edhe të domosdoshme që Kuvendi ynë të jetë arena frymëzuese e përballjes qytetare, ku zëra të ndryshëm përfshihen në një dialog të frytshëm”, shprehet Presidenti i Republikës.

Përgjatë procesit të anëtarësimit në Bashkimin Evropian, Begaj thekson se deputetët duhet të përmbushin në kohë masat ligjore të përfshira në Planin Kombëtar të Integrimit.

Gjithashtu, një tjetër çështje prioritare, sipas Begajt, është lufta kundër krimit dhe korrupsionit, për të cilën Kreu i Shtetit u shpreh se inkurajon Kuvendin të promovojë politikën e antikrimit dhe antikorrupsionit si një përballje reale me një të keqe që duhet ta luftojmë në çdo nivel e çdo fushë të këtij fenomeni gërryes për ekonominë dhe kërcënues për demokracinë.

Në këtë aspekt, Presidenti Begaj u kërkoi deputetëve të mbështesin institucionet e drejtësisë dhe agjencitë e zbatimit të ligjit duke forcuar kapacitetet e tyre financiare, njerëzore dhe infrastrukturore.

Për sa u përket sfidave të reja globale që prekin çështjet e sigurisë, apo ato social-kulturore, Presidenti Begaj theksoi nevojën e përditësimit të strategjive dhe kornizave ligjore për t’u përshtatur me ndryshimet gjeopolitike dhe zhvillimet e shpejta teknologjike.

Begaj përfundon mesazhin e tij drejtuar Kuvendit duke u shprehur:

“Në këto kohë kur sakrificat e brezave po kthehen në mbështetje të gjeneratave të reja, duke i kthyer sfidat e ndryshme globale e rajonale në mundësi për vendin tonë, është e domosdoshme që parlamenti të bëhet aleati kryesor i përparimit të vendit tonë. 

Le ta kthejmë këtë hapësirë në Kuvendin e ideve më të bukura shqiptare e përballjes më të pasur demokratike të rajonit”./ CNA





Lajmet e fundit nga