Rrëfimi i ambasadorit të BE-së, Silvio Gonzato: U martova me një burrë

19 Maj 2025, 10:08, Aktualitet CNA

Rrëfimi i ambasadorit të BE-së, Silvio Gonzato: U martova me

Ambasadori i Bashkimit Europian, Silvio Gonzato

Në javën kulturore europiane dhe nën moton e Bashkimit Europian: “Të bashkuar në diversitet”, ambasadori i Bashkimit Europian, Silvio Gonzato, ka pranuar orientimin e tij seksual, duke thënë se është homoseksual.

Në një intervistë për “Dita Jonë” në "A2CNN", ambasadori i BE-së tha se në Shqipëri duhet ndryshuar mendësia në lidhje me homoseksualitetin.

“Tema kryesore është krijimi i kësaj hapësire në të cilën njerëzit të ndërveprojnë në mënyrë të lirshme dhe të formësojnë vizionin e tyre për BE-në. Do të kemi disa teatro. Një tjetër është ekspozitë nga Blerta Kambo. Dashuria është e njëjtë për të gjithë, aty protretizohen mënyra të ndryshme dashurie, jo vetëm mes një femër dhe një mashkulli. Besoj se njerëzit e dinë që jam homoseksual, por nuk abuzoj me pozicionin që kam. U zhgënjeva pasi kemi pasur vështirësi për të gjetur vendin ku do të organizohej, se njerëzit thoshin nuk do t’i tregojmë këto fotografi se kemi fëmijë, por ato janë foto me dashuri. Janë thjesht fotografi. Në Shqipëri duhet të arrihet ky ndryshim i mendësisë. Njerëzit të pranojnë larminë dhe mendoj që kjo do të japë efektin e vet. Kemi muzikë dhe tematika të tjera si emigracioni që prek shqiptarët dhe marrëdhënia mes gjuhës e pushtetit. Të gjitha këto për të simuluar reflektim për sfidat me të cilat përballemi. Kultura është mjet i fuqishëm për të tejkaluar kufijtë dhe prandaj e bëmë këtë në partneritet me artistët”.

Gonzato tha se nuk ka asgjë për të fshehur, ndaj dhe rrëfeu faktin se ka qenë i martuar me një grua dhe më pas me një burrë.

“Është e vështirë sot të ekspozohesh në këtë formë dhe bëhesh i cenueshëm, por më pëlqen të jem i sinqertë. Nuk kam diçka për të fshehur. Të shprehesh se kush je në të vërtetë nuk është e lehtë, por e rëndësishme të jesh i ndershëm. Mënyra si jam unë nuk është kërcënim për ju dhe ndjenjat që kam janë të njëjta me ju. Po ne jemi ndryshe, jemi me këtë diversitet dhe jemi edhe të njëjtë. Me pëlqen edhe ideja e ekspozitës, ne kemi një thelb njerëzorë dhe ju ndoshta e dini që unë kam qenë i martuar me një femër dhe më pas u martova me një burrë dhe problemet janë njësoj”, ka thënë ambasadori i BE-së./ CNA