web counter
LEXO PA REKLAMA!

SHKARKO APP

App Store
Google Play

E fundit!

x

Marrëveshja me Italinë për refugjatët/ Gjykata Kushtetuese pezullon ratifikimin

13 Dhjetor 2023, 17:21, Aktualitet CNA

Marrëveshja me Italinë për refugjatët/ Gjykata Kushtetuese

Gjykata Kushtetuese ka pezulluar ratifikimin e marrëveshjes Shqipëri-Itali për emigrantët.

Ky vendim vjen pasi Gjykata Kushtetuese shqyrtoi kërkesën e 30 deputetëve të Kuvendit të Republikës së Shqipërisë të dorëzuar më datë 06 dhjetor 2023 ku kërkohet kontrolli i kushtetutshmërisë së marrëveshjes në fjalë.

Grupi i deputetëve ngriti pretendime se nuk është respektuar procedura e negocimit dhe e nënshkrimit, pasi Protokolli i bashkëpunimit bën pjesë në ato kategori marrëveshjesh që kërkojnë autorizimin e Presidentit, pasi prek çështje të territorit dhe të të drejtave themelore, sipas nenit 121, pika 1, shkronjat "a" dhe "b", të Kushtetutës.

Po ashtu, deputetët paraqitën edhe tre kërkesa të njëjta për pezullimin e procedurave parlamentare për ratifikimin, mbi shkakun se shqyrtimi dhe votimi i Protokollit është planifikuar nga Kuvendi për seancën plenare të datës 14 dhjetor 2023.

Bazuar në argumentet e paraqitura në kërkesën e 30 deputetëve opozitarë Kolegji i Gjykatës Kushtetuese, në datën 11 dhjetor 2023, pasi mori në shqyrtim paraprak çështjen vendosi ta kalojë atë për shqyrtim në Mbledhjen e Gjyqtarëve.

Mbledhja e Gjyqtarëve, e mbledhur sot, në datë 13 dhjetor 2023, vlerësoi se kërkesa plotëson kriteret paraprake të pranueshmërisë dhe vendosi kalimin e çështjes për shqyrtim në seancë plenare, mbi bazë dokumentesh.

Shqyrtimi në seancë i çështjes pezullon automatikisht procedurat e ratifikimit në Kuvend të Protokollit të bashkëpunimit, deri në vendimin përfundimtar të Gjykatës Kushtetuese.

Mbledhja e Gjyqtarëve vendosi që seanca të zhvillohet në datën 18 janar 2024, ora 10:00./ CNA

Marrëveshja me Italinë për refugjatët/ Gjykata Kushtetuese





Lajmet e fundit nga