Kremtimi i Shën Joan Vladimirit/ Mesazhi i Fortlumturisë së Tij: Martir të jetë çdo i krishterë, të dëshmojmë për besimin

4 Qershor 2025, 15:21, Aktualitet CNA

Kremtimi i Shën Joan Vladimirit/ Mesazhi i Fortlumturisë së Tij:

Më 3-4 qershor 2025 u mbajt panairi i përvitshëm i Shën Joan Vladimirit, mbretit të lavdëruar e çudibërës, në Shijon të Elbasanit, në manastirin që mban emrin e këtij shenjtori të madh të kishës sonë, nën drejtimin e Fortlumturisë së Tij, Kryepiskopit të Tiranës, Durrësit dhe Gjithë Shqipërisë, Imzot Joanit.

Fortlumturia e Tij Joani gjithashtu mbajti predikimin e tij në Manastirin e Shën Joan Vladimirit. Kryepiskopi u shpreh se sot besimtarët përkujtojnë një shenjt dhe martir si Shën Joan Vladimiri.

Më tej, Fortlumturia e Tij u shpreh se martir duhet të jetë çdo i krishterë, çka nënkupton se çdo besimtar duhet të dëshmojë për besimin te të tjerët. Kryepsikopi u tha besimtarëve se nëse humbet ideja e martirit është humbur dhe ideja e besimit, Zoti do që të gjithë të dëshmojnë besimin.

“Kemi bekimet që të kemi lipsanet e një shenjti të madh, i cili donte që të qëndronte këtu. Madje në jetën e tij tregohet që kur donin të vinin dhe ta merrnin, lipsani u rëndua aq shumë sa nuk mund ta ngrinin dot, si shenjë që shenjti donte të qëndronte në këtë vend. Sot ne përkujtojmë një shenjt dhe një martir dhe martirët janë shumë të rëndësishëm në jetën tonë. Martir duhet të jetë çdo i krishterë, martir nuk do të thotë vetëm të japësh jetën. Kuptimi i parë i fjalës martir është për të dëshmuar, gjë që do të thotë gjithsecili nga ne duhet të dëshmojë për besimin dhe te të tjerët. Jeta jonë duhet të jetë një dëshmi, që do të thotë do jetë një martir. Nëse ne humbasim idenë e martirit kemi humbur idenë dhe të besimit tonë. Zoti na do që të gjithë ne të dëshmojmë për besimin tonë, sepse njerëzit duke parë besimin tonë, atëherë ndoshta dhe ata do ta njohin Perëndinë. Përndryshe do të ndodhë e kundërta”, u shpreh Fortlumturia e Tij Joani./ CNA