Marrëveshja e pensioneve Shqipëri-Itali së shpejti realitet

21 Shtator 2016, 13:25, Aktualitet CNA

Gjatë vizitës në Itali, ministri Blendi Klosi u prit në takim pune nga zëvendëskryeministri Italian Tommaso Nannicini. Çështja e njohjes së pensioneve nga të dyja shtetet ishte në fokus të takimit. Negociatat për këtë çështje kanë nisur disa kohë më parë me shtetin Italian.

Ministri Klosi kërkoi nga zëvendëskryeministri Italian, Nannicini ecjen më shpejt me njohjen e marrëveshjes së kontributeve shoqërore, marrëveshje që do tu vijë në ndihmë mijëra shtetasve shqiptarë që vitet e punës i kanë ndarë mes Shqipërisë dhe Italisë, sikundër edhe qindra qytetarëve italianë që gjithashtu kanë ndarë vitet e punës mes të dyja shteteve.

Klosi kërkoi nga zyrtari i lartë Italian t?i jepet një impuls i ri, njohjes së marrëveshjes së pensioneve, për ta përmbyllur sa më shpejt marrëveshjen për këtë çështje.

Nannicini u angazhua të vijojë të shtyjë këtë proces përpara, për të miratuar sa më shpejt marrëveshjen e pensioneve me Shqipërinë. Në këtë kuadër ai pranoi ftesën e ministrit Klosi, për të vizituar sa më shpejt Shqipërinë, ku marrëveshja e pensioneve do të diskutohet në terma konkrete. Italia, është vendi me numrin më të madh të emigrantëve shqiptarë, së bashku me Greqinë.

Çështjet e punësimit dhe veçanërisht invensimeve italiane në Shqipëri, ishin temat e diskutuara mes Klosi dhe Nannici në këtë takim. Ministri Klosi vuri theksin tek mbështetja që po i jep Italia, Arsimit dhe Formimit Profesional, duke ofruar ndihmë financiare në disa mijëra euro dhe asistencë në ngritjen dhe fuqizimin e Arsimit Profesional.

Italia po ndërmjetëson binjakëzimin e një sërë shkollash profesionale, veçanërisht të Hoteli ? Turizmit, me shkollat më të mira të këtij profilit në këtë shtet. Bashkëpunimi me Italinë për mbështetjen konkrete të Arsimit Profesional në Shqipëri, do të jëtë gjithashtu tema e diskutimit me z. Nannici në vizitën e tij në vendin tonë.

Mes Klosit dhe Nannicinit u konfirmua edhe njëherë marrëdhënia shumë e mirë mes dy vendeve tona, rritja e bashkëpunimit dhe kontakteve në të gjitha sektorët, si dhe rëndësia që zë kjo në zhvillimin e të dyja vendeve. Ministri Klosi falenderoi qeverinë italiane për gjithë kontributin e dhënë në rrugën e zhvillimit dhe integrimit të Shqipërisë, ku Italia është jo vetëm partner , por edhe vend mik i Shqipërisë. Nannicini, vlerësoi Shqipërinë si një partner dhe vend mik i Italisë, me një marrëdhënie të shkëlqyer. /Citynews.al