E fundit!

13:13 Opinione Eduard Halimi

Si ta kuptojmë atë që po ndodh në Aeroportin e Vlorës?

Si ta kuptojmë atë që po ndodh në Aeroportin e Vlorës/ 7 K...

Elvis Rroshi vazhdon detyrën si kryebashkiak/ Edi Rama nuk e shkarkon

18 Gusht 2016, 08:13, Aktualitet CNA

Elvis Rroshi, Kryebashkiaku në detyrë i Kavajës, vijon të mbajë postin e qytetarit numër 1 në këtë qytet, edhe pse ndodhet në arrest shtëpie.

Rroshi u arrestua fillimisht në kuadër të ligjit të dekriminalizimit për fshehjen e të dhënave, por më pas Gjykata vendosi masën e sigurisë arrest shtëpie. Prej gati 4 muajsh Rroshi ndodhet nën këtë masë sigurie, por kjo nuk e pengon atë të vijojë detyrën, duke drejtuar punën në këtë bashki nga shtëpia. Kjo të paktën nëse zbatohet ligji, që nuk e lejon Rroshin, deri në një vendim të dytë të dalë nga shtëpia.

Megjithëse është Kryebashkiaku më i akuzuar për shkak të të shkuarës së tij, madje ishte i pari ndër të zgjedhurit vendorë që u bë subjekt i ligjit të dekriminalizimit, Kryeministri Edi Rama nuk ndërmorri asnjë hap për shkarkimin e tij. Madje në mënyrë të çuditshme, Rroshi edhe aktin e dorëheqjes së bërë publikisht, e tërhoqi 3 ditë më pas, duke vijuar të qëndrojë në detyrën e Kryebashkiakut.

Për Kryebashkiakun e Kavajës u artikuluan akuza se kishte problem me drejtësinë italiane, zvicerane dhe gjermane, për vepra penale ku përfshihej edhe trafiku i drogës.

Citynews përmes burimeve nga Bashkia e Kavajës ka mësuar se Kryebashkiaku Rroshi drejton dhe komandon punët dhe stafin nga shtëpia, çka mund të përbëjë një rast unikal jo vetëm në Shqipëri, që një i zgjedhur vendor, të drejtojë një qytet ka qenë në krye të detyrës.

Burimet theksojnë se madje stafi i ngushtë i Rroshit konsultohet me të, ose përmes telefonit apo duke e vizituar në banesën e tij, ku normalisht duhet të qëndrojë deri në përfundimin e masës së sigurisë.

Ndoshta kjo periudhë kur Rroshi ndodhet larg syrit të qytetarëve dhe mediave, por duke drejtuar Bashkinë e Kavajës, njësoj si më parë, e ka larguar disi vëmendjen nga Kryebashkiaku që për muaj me rradhë u vendos nën akuzat e vazhdueshme të opozitës. Kjo e fundit prej disa javësh nuk flet më për Kryebashkiakun e Kavajës, sikundër partnerët e PS-së në koalicionin qeveritar, LSI-ja, nuk ndjehet aspak e shqetësuar nga mënyra sesi drejtohet Bashkia e Kavajës, megjithëse në Këshillin Bashkiak rezulton forcë e tretë me 5 këshilltarë, ndërkohë që PS dhe PD kanë përkatësisht 10 dhe 9 anëtarë.

Duket se shprehja popullore hekuri rrihet sa është i nxehtë, mund të ketë kuptim në rastin e Kryebashkiakut të Kavajës, pasi çdo ditë dhe javë që kalon, duket se sfumon akuzat dhe mund të ndodhë ashtu sikundër në shumë raste të tjera në politikën shqiptare, që akuzat thjesht mbeten në letër dhe i përkasin një kohe të caktuar. /citynews/