Shkodër/ PD: Akt i turpshëm i Keti Bazhdarit, përdori të ngujuarit për të rritur votëbesimin

3 Qershor 2015, 12:36, Politikë CNA

Partia Demokratike në Shkodër ka reaguar pas daljes së kandidates Keti Bazhdari në emisionin e djeshëm të Rudina Xhungës. Në deklaratën e PD thuhet se Bazhdari e përdori emisionin dhe fenomenin e gjakmarrjes për të rritur votëbesimin. Sipas PD, ajo që ndodhi dje ishte një shfaqe e turpshme dhe se fenomeni I gjakmarrjes nuk luftohet me propagandë politike.

Deklarata e PD

Në emisionin e radhës të gazetares Rudina Xhunga, u përballëm për të disatën herë me etiketimin e Shkodrës si qyteti i gjakmarrjes.

Një qasje e tillë ndaj një fenomeni të pranishëm në të gjithë Shqipërinë, është jo vetëm qartësisht tendencioze, por edhe shumë larg një synimi të dobishëm që duhet të ketë në thelb përcjelljen e një mesazhi human, përtej shënjestrimeve lokale dhe diskriminimit social të një komuniteti, bazuar në prejardhjen e tij.

Pjesë e kësaj qasje ishte këtë herë edhe kandidatja socialiste për Bashkinë e Shkodrës, Keti Bazhdari.

E vendosur në një situatë më komode, në një emision që dukej sikur ishte përgatitur enkas për të rritur vetëbesimin e lëkundur nga daljet e fundit përballë kandidates kundërshtare Voltana Ademi, Keti Bazhdari, ?filantropja? që nuk flet për bamirësitë e veta, nuk u kursye të përdorë vajzën e vogël Marselën, dhe tragjedinë e familjes së saj.

Kjo e bëri kandidaten Bazhdari të tregojë jo shpirtmadhësinë përmes aktrimit mediatik, por mendësinë e mosqytetarisë.

Të bësh dhurata në publik, të ofrosh për reklamë vend pune dhe të kërkosh të manipulosh me simbolikën e një fëmije, është shumë larg frymës që duhet të përfaqësojë një filantrope e vërtetë, është shtirje e lehtë për t?u dalluar dhe përbuzur njëkohësisht.

Fenomeni i gjakmarrjes nuk luftohet me propagandë zgjedhore, sepse Shteti dhe Drejtësia nuk mund të jenë pronë e asnjë kandidati për bashki, sepse Drejtësia dhe Policia nuk i përkasin pushtetit lokal, por i përkasin çdo qytetari të Republikës së Shqipërisë.

Prandaj, Partia Demokratike Shkodër dëshiron të theksojë se manipulimi i fëmijëve nuk ka asgjë dinjitoze në vetvete dhe se një qytet evropian dhe përparimtar siç është Shkodra, nuk ndërtohet duke e shëmtuar atë publikisht për qëllime elektorale.