E fundit!

22:50 Kronika

Në kërkim pasi favorizoi ndërtimet pa leje, dorëzohet ish-shefi i policisë Sarandë

Mbrëmjen e sotme është dorëzuar në policinë e Sarandës, is...

Pagë e majme, zbulohet sa do të përfitojë Asani në Iran

30 Gusht 2025, 16:52, Sport CNA

Jasir Asani është bërë pjesë e kampionatit iranian, duke firmosur me skuadrën e njohur të Esteghlalit nga Teherani. Transferimi i futbollistit të kombëtares shqiptare ka zgjuar interes të madh në mediat vendase, të cilat e kanë cilësuar si një lëvizje të bujshme dhe një vlerë të shtuar për kampionatin. Megjithatë, krahas entuziazmit, diskutimet kanë qenë të shumta edhe për kostot financiare që ky operacion ka sjellë për klubin.

Sipas raportimeve nga Irani, drejtuesit e Esteghlalit kanë marrë përsipër një rrezik të madh ekonomik, në një kohë kur klubi po përballet me probleme financiare. Marrëveshja e nënshkruar me Asanin kap vlerën e 2.6 milionë dollarëve për dy sezone, që do të thotë 1.3 milionë dollarë në vit. Një element i rëndësishëm është se kjo pagë do të paguhet e plotë, pa asnjë lloj tatimi, duke e bërë kontratën edhe më të rëndë për arkat e klubit. Krahasuar me realitetin iranian, ku pagat mesatare deri në 500 dollarë taksohen në mënyrë të konsiderueshme, ky është një diferencim i madh që ka hapur polemika.

Në anën tjetër, vëmendje i është kushtuar edhe aspektit jashtë fushës. Mediat në Teheran kanë rikthyer në qendër të vëmendjes disa episode nga e kaluara e Asanit, sidomos periudhën e tij te skuadra koreane e Guangju, ku sipas tyre kishte probleme me disiplinën dhe qëndrimin profesional. Këto episode konsiderohen si një paralajmërim për drejtuesit e Esteghlalit, të cilët do të duhet të menaxhojnë jo vetëm talentin e futbollistit, por edhe sjelljen e tij.

Megjithatë, pjesa më e madhe e komenteve theksojnë përfitimet sportive që pritet të sjellë Asani. Ai cilësohet si një lojtar me cilësi të veçanta në krahë, i aftë të luajë si në të majtë ashtu edhe në të djathtë. Në Iran ai është prezantuar me epitetin “Arjen Roben i Azisë”, për shkak të stilit të lojës dhe aftësisë për të krijuar diferencë me goditjet nga distanca dhe depërtimet individuale. Futbollisti shqiptar ka treguar nivel të lartë performance në një nga ligat më konkurruese të kontinentit, atë të Koresë së Jugut, si edhe në ndeshjet e Champions Ligës së Azisë, duke e bërë transferimin e tij një garanci sportive për skuadrën iraniane.

Pritshmëritë për Asanin janë të larta, pasi trajneri Sa Pinto pritet ta përfshijë menjëherë në skemat e tij taktike. Portugezi preferon të luajë me modulin 4-2-3-1, ku Asani mund të përshtatet si në krahun e djathtë ashtu edhe në të majtë të repartit ofensiv.

Gjithsesi, një element që nuk duhet anashkaluar është koha e përshtatjes. Edhe pse Asani ka eksperiencë në disa kampionate aziatike, stili i futbollit iranian ka specifikat e veta dhe lojtari mund të ketë nevojë për një periudhë kalimtare për t’u ambientuar plotësisht. Në këtë kuadër, suksesi i tij do të varet jo vetëm nga aftësitë teknike, por edhe nga mënyra se si do të menaxhohet procesi i integrimit në ekip dhe në kampionat.