Një tjetër stadium modern në Shqipëri, presidenti Duka inspekton punimet

16 Janar 2026, 14:15, Sport CNA

Një tjetër stadium modern në Shqipëri, presidenti Duka

Federata e Futbollit, në bashkëpunim me Bashkinë Gramsh, ka nisur punimet për rikonstruksionin e stadiumit “Myslim Koçi”, një tjetër investim i rëndësishëm në funksion të përmirësimit të infrastrukturës sportive dhe zhvillimit të futbollit në të gjithë vendin. Ky projekt synon krijimin e kushteve më të mira për zhvillimin e aktiviteteve sportive, veçanërisht për ekipet vendase dhe moshat e reja.

Me nisjen zyrtare të punimeve, Presidenti i FSHF-së, Armand Duka, inspektoi nga afër procesin e rikonstruksionit gjatë një vizite në Gramsh, ku u prit nga Kryetari i Bashkisë, Besion Ajazi. Gjatë inspektimit, Presidenti Duka u njoh në detaje me projektin, i cili parashikon rikonstruksionin e dhomave të zhveshjes, ndërtimin e tribunës së re, modernizimin e ambienteve ndihmëse, si edhe instalimin e tapetit me bar artificial në fushën e stadiumit “Myslim Koçi”, duke e përshtatur atë me standardet bashkëkohore për zhvillimin e ndeshjeve dhe stërvitjeve.

Në një prononcim për fshf.org, Presidenti Duka vlerësoi projektin për stadiumin e Gramshit, duke e cilësuar si një impiant modest, por modern, që plotëson standardet për zhvillimin e ndeshjeve kombëtare dhe ndërkombëtare të nivelit të dytë.

Kreu i qeverisë së futbollit shqiptar falënderoi Bashkinë Gramsh për bashkëpunimin dhe mbështetjen e vazhdueshme në zhvillimin e futbollit, duke theksuar rëndësinë e zhvillimit të futbollit në çdo qytet të Shqipërisë.

Një tjetër stadium modern në Shqipëri, presidenti Duka

“Kënaqësi për mua të jem sot në Gramsh bashkë me Kryetarin e Bashkisë për të inspektuar punimet e ndërtimit të këtij stadiumi, modest por modern, i bukur, i cili plotëson të gjitha kushtet për organizimin e ndeshjeve jo vetëm të kampionatit kombëtar shqiptar, por edhe internacionale deri në një lloj niveli, pra një stadium i kategorisë së dytë.

Dua ta falënderoj kryetarin e bashkisë për bashkëpunimin në ndërtimin e stadiumit, por jo vetëm kaq, por për të gjithë bashkëpunimin në zhvillimin e futbollit edhe në këto anë, sepse futbolli nuk luhet vetëm në Tiranë, Durrës apo në qendrat e mëdha urbane, por duhet të luhet në çdo cep të Shqipërisë, në çdo cep të globit.

Kënaqësi që ju keni 250 fëmijë që luajnë futboll në zonën e Gramshit, keni një ekip vajzash që është nga më kualitativët në kampionatin kombëtar shqiptar dhe uroj që të kemi edhe me djemtë të njëjtin sukses që keni edhe me vajzat. Jam shumë i sigurt që stadiumi i ri dhe fusha tjetër që do të bëhet për stërvitje pas stadiumit, do t’i shërbejë jo vetëm ekipit të vajzave, por edhe ekipit të djemve për të shkuar akoma më përpara.

Uroj që të kemi sa më shumë fëmijë që të luajnë futboll jo vetëm në stadium, por edhe në fushën tjetër të stërvitjes që kemi në Gramsh dhe të edukohen nëpërmjet lojës tonë të futbollit. Edhe njëherë të falënderoj kryetar për të gjithë bashkëpunimin, për të gjithë mbështetjen që i jep futbollit, i njohim vështirësitë që keni në këtë qytet, por pasioni juaj ka bërë që ta ndihmoni atë.
Të falënderoj shumë dhe uroj që të takohemi për ta inauguruar stadiumin në sezonin e ri futbollistik në shtator”, – tha Presidenti Duka.

Kryetari i Bashkisë Gramsh, Besion Ajazi falënderoi Presidentin Duka dhe FSHF-në për mbështetjen e dhënë për zhvillimin e futbollit në Gramsh, duke e cilësuar stadiumin e ri si një investim shumë të rëndësishëm për qytetin, ekipet dhe moshat e reja.

Ai theksoi se impianti do të jetë modern dhe i kompletuar me të gjitha ambientet e nevojshme, duke u shndërruar në një vlerë të shtuar për komunitetin dhe brezat e rinj.

“Shumë faleminderit President. Faleminderit edhe për vizitën, inspektimin në këtë fazë të fillimit të punimeve, por doja t’ju falënderoja shumë për mbështetjen që i keni dhënë Gramshit dhe sportit këtu, veçanërisht dhe ekskluzivisht futbollit.

Është një investim shumë i rëndësishëm për qytetin tonë, është një investim shumë i rëndësishëm për ekipin, por edhe për moshat deri në arritjen e bërjes së realizimit të një projekti tjetër, ndoshta një kompleks sportiv stërvitor. Edhe moshat do të kenë mundësi ta përdorin stadiumin dhe ambientet e reja të stadiumit të qytetit tonë.

Doja të thoja që ky stadium i ri është fiks ashtu siç thatë ju, një stadium i vogël, por shumë modern dhe ashtu do të jetë, por është edhe një xhevahir i shtuar në kurorën e investimeve të qytetit tonë. Është një investim shumë i rëndësishëm, një investim që i shërben brezave dhe fëmijëve që të kenë mundësi ta përdorin në kohën dhe mënyrën më të shëndetshme të mundshme, larg veseve të këqija. Ky është një stadium që do t’i ketë të gjitha komponentët, dhomat e zhveshjes, tribunën shumë moderne, 1500 vende, do të ketë dhomat e arbitrave, të antidopingut, të mjekëve, të gjitha ambientet që parashikon një stadium i kompletuar.

Sigurisht do të kërkojmë edhe mbështetjen e mëvonshme të FSHF dhe tuajën personalisht që të vazhdojmë edhe me projektin tjetër, për të përmbyllur po themi atë zinxhirin e investimit në futboll për këta fëmijë dhe për qytetin tonë. Shumë faleminderit edhe njëherë për mbështetjen dhe ta dini që Federata Shqiptare e Futbollit dhe ju personalisht zini një vend shumë të veçantë në qytetin tonë”, – tha Kryetari i Bashkisë Gramsh, Besion Ajazi.