Fitoi zemrat e tifozëve të Interit, Sucic tregon fëmijërinë: Milja lopët në fshat

27 Gusht 2025, 19:25, Sport CNA

Fitoi zemrat e tifozëve të Interit, Sucic tregon

Petar Sucic ka fituar menjëherë zemrat e tifozëve të Interit, pas paraqitjes së shkëlqyer të bërë në ndeshjen e javës së parë ndaj Torinos.

Mesfushori i ri kroat, ka folur për herë të parë pas debutimit të tij në Serie A, në një intervistë për “On Board” në DAZN. Ai tregoi se ka kaluar fëmijërinë në Bugojno, në një fshat të vogël në Kroaci, ku ndihmonte të atin në fermë me bagëtitë.

“Jam rritur në një fshat të vogël, me familjen time. Kemi një fermë të vogël. Babait tim i pëlqen të mbajë lopë. Kemi disa. Kur isha i vogël shkoja në mëngjes dhe e ndihmoja babain për mjeljen e lopëve. Më pëlqente ai stil jetese. Mendoj se kam qenë shumë i lumtur me atë jetë. Gjithë ditën qëndroja jashtë dhe isha i lumtur. Kam kujtime të bukura dhe shumë emocione për vendin ku u rrita. Kishim edhe kafshë të tjera”, tha ai.

Sucic tha se kujtimet e asaj kohe janë të paharrueshme dhe e kanë formuar si njeri. Një nga momentet më të veçanta të karrierës së tij mbetet debutimi në Champions League, ku shënoi një nga golat më të bukur të jetës së tij.

Lojtari theksoi se nuk preferon të kalojë kohë në rrjete sociale, pasi zgjedh të jetë pranë familjes dhe të pushojë nga presioni i futbollit. Ai foli edhe për marrëdhënien e ngushtë me të vëllanë Luka, me të cilin ka luajtur që fëmijë dhe tashmë ndajmë eksperiencën në kombëtare.

“E mbaj mend ndeshjen e parë në Champions League. Binte shi i madh dhe mendoja se nuk do të zhvillohej ndeshja. Në fund dolëm në fushë, isha shumë i lumtur dhe madje shënova një nga golat më të mirë në jetë. Është natë që do e kujtoj gjithmonë.

Nuk më pëlqen të humbas kohë në rrjetet sociale. Ato janë një mjet shumë efektiv, por në të njëjtën kohë, mund të humbasësh pesë orë duke u marrë me to dhe unë preferoj të jetoj jetën reale. Ne jemi gjithmonë nën vëmendjen e medias. Kalimi i kohës me familjen time është një nga arsyet pse nuk përdor mediat sociale”, u shpreh Sucic.

Sipas tij, përfaqësimi i kombëtares është një nga emocionet më të mëdha të jetës dhe një mundësi që e bën shumë krenar.