"Krah për krah" me një robot humanoid/ Surpriza e Melania Trump në konferencën mbi IA

25 Mars 2026, 17:49, Kosova & Bota CNA

"Krah për krah" me një robot humanoid/ Surpriza e Melania

Një robot humanoid mori vëmendjen e ditës së dytë të konferencës ndërkombëtare të Zonjës së Parë të SHBA-së, Melania Trump mbi inteligjencën artificiale në arsim. Roboti shoqëroi Melania Trump përgjatë një korridori të Shtëpisë së Bardhë përpara se t’u drejtohej të ftuarve, duke iu uruar mirëseardhjen në disa gjuhë.

View this post on Instagram

A post shared by CNA.al (@cna.lajme)

Zonja e Parë do të presë bashkëshortet e liderëve nga e gjithë bota këtë javë, si pjesë e nismës së saj "Nxitja e së Ardhmes", e cila përqendrohet në përmirësimin e jetës së fëmijëve përmes arsimit dhe teknologjisë.
Qëllimi i këtij veprimi është të shfrytëzojë potencialin e inteligjencës artificiale, duke adresuar njëkohësisht rreziqet e mundshme që lidhen me zhvillimin e saj të shpejtë.

“Bota jonë po transformohet dhe nëpërmjet inteligjencës artificiale tani mund të qasemi në njohuritë e grumbulluara gjatë shekujve të historisë njerëzore”, tha Melania Trump, duke theksuar se është detyrim i shtetit të sigurojë që brezi i ardhshëm të ketë një nivel të lartë të njohurive dhe arsimit teknologjik.

Siç vuri në dukje ajo, investimi në arsimin dhe trajnimin teknologjik të fëmijëve është një faktor kyç në ruajtjen e forcës ekonomike të Shteteve të Bashkuara në planin afatgjatë.

Iniciativa u prezantua për herë të parë në shtator në Asamblenë e Përgjithshme të OKB-së, ndërsa përfaqësues nga 45 vende morën pjesë në takim.

Dita e parë e punës u përqendrua në përdorimin e inteligjencës artificiale në arsim, aftësitë dixhitale, sigurinë online dhe mjetet e teknologjisë arsimore (EdTech), të cilat përfshijnë softuerë dhe aplikacione dixhitale për përdorim në klasa.

Në ditën e dytë të eventit, Melania Trump ia dha fjalën Zonjës së Parë Franceze, Brigitte Macron, e cila theksoi nevojën për t'u mbrojtur nga “deepfakes” (video dixhitale të krijuara me inteligjencë artificiale që mund të riprodhojnë realisht fytyrat dhe situatat).

Ajo gjithashtu theksoi rëndësinë e kufizimit të përdorimit të telefonave celularë dhe pajisjeve portative nga fëmijët e vegjël, veçanërisht ata nën tre vjeç, si dhe ekspozimin e tepërt në mediat sociale. /CNA