Komisioni Europian: Mund të kemi një rrjet hekurudhor me shpejtësi të lartë brenda vitit 2040

5 Nëntor 2025, 19:00, Kosova & Bota CNA

Komisioni Europian: Mund të kemi një rrjet hekurudhor me

Komisioni Europian ka deklaruar të mërkurën se një rrjet hekurudhor me shpejtësi të lartë mund të jetë i mundur të realizohet brenda vitit 2040. Komisioni Europian tha se sipas këtij plani, trenat mund të arrinin shpejtësinë mbi 250 km/orë, kur ishte e mundur, për të siguruar lidhje më të shpejta në të gjithë kontinentin.

Nëse plani realizohet, pasagjerët e këtyre trenave, mund të udhëtojnë midis kryeqyteteve gjermane dhe daneze brenda katër orëve, në vend të shtatë orëve që janë sot, ndërsa Sofja dhe Athina do të jenë vetëm gjashtë orë larg deri në vitin 2035, në vend të gati 14 orëve që janë aktualisht. Po ashtu, idhjet e reja ndërkufitare do ta shkurtonin një udhëtim midis Lisbonës dhe Madridit në tre orë, nga nëntë që është aktualisht.

Komisioneri i transportit i BE-së, Apostolos Tzitzikostas, tha se planet përcaktojnë krijimin e “një rrjeti hekurudhor me shpejtësi të lartë dhe vërtet evropian deri në vitin 2040”. Komisioni ka parashikuar se kjo do ta bënte gjithashtu udhëtimin me tren një alternativë më tërheqëse udhëtimi.

Ekspertët e jashtëm, sipas komisionit, kanë vlerësuar se nevojiten 546 miliardë euro për të trefishuar madhësinë e rrjetit me shpejtësi të lartë, duke lejuar trenat të lëvizin me shpejtësi mbi 250 km/orë.

Si pjesë e një liste të gjatë veprimesh, ekzekutivi i BE-së ka premtuar një strategji financimi dhe do të kërkojë të përdorë fondet e BE-së për të nxitur qeveritë kombëtare dhe investimet private, në veçanti për të paguar për infrastrukturën dhe materialin lëvizës. Elementë të tjerë të planit përfshijnë sisteme të përmirësuara të sinjalizimit dhe biletave në të gjithë Evropën.

Organizata Evropiane e Konsumatorëve (BEUC) i përshëndeti planet si një hap përpara për udhëtime të qëndrueshme. Organi evropian i industrisë, Komuniteti i Kompanive Hekurudhore dhe Infrastrukturore (CER), gjithashtu i mirëpriti planet. /CNA