web counter
LEXO PA REKLAMA!

SHKARKO APP

App Store
Google Play

E fundit!

x

Sulmuesi i Skënderbeut: Ndryshimet me trajnerin e ri të dukshme, argëtohemi në fushë

2022-12-13 20:54:09, Sport CNA

Sulmuesi i Skënderbeut: Ndryshimet me trajnerin e ri të dukshme,

Fitorja e dytë nën drejtimin e Ivan Gvozdenoviç ka shtuar moralin në kampin bardhekuq. Këtë e pohon edhe autori i golit të dytë të Skënderbeut, Abdul Temitope. Në një prononcim të dhënë për “Panorama Sport” pas ndeshjes, sulmuesi i cili la fushën e lojës i dëmtuar, shpjegon rëndësinë e kësaj fitoreje dhe arritjen e vendit të tretë në renditje dhe mbi të gjitha situatën momentale në kampin bardhekuq, pas uljes së Ivan Gvozdenoviç në stol.

“Kur fiton, normalisht që ndihesh mirë dhe për ne kjo është e rëndësishme. E them këtë pasi prej kohësh kishim harruar ndjesinë e fitores e aq më tepër një të tillë, bindëse dhe pa vuajtje. Kjo na bën të ndihemi të qetë dhe të jemi të bindur në forcat tona. Ka qenë shumë e nevojshme të merrnim fitoren në ndeshjen e shtëpisë pasi do të na jepte vijimësi dhe mbi të gjitha na çoi në vendin e tretë në renditje.

Tani jemi vetëm pesë pikë larg kreut dhe i kemi të gjitha mundësitë të kapim majën, pasi ka ende shumë ndeshje përpara. E rëndësishme është që ekipi po luan mirë. Nuk e di se kur kemi bërë një lojë të tillë më parë, por ndryshimet janë të dukshme. Me trajnerin e ri kemi krijuar menjëherë harmoni dhe kemi rritur entuziazmin në ekip. Jemi më të qetë dhe po argëtohemi mjaft në fushën e lojës. Kjo është shumë e rëndësishme për ecurinë e një ekipi”, theksoi fillimisht Temitope.

NDESHJET E RADHËS – Dy takimet e mbetura të këtij viti, padyshim që janë shumë të rëndësishme dhe gjashtë pikët maksimale do të ishin mbyllja më e mirë e vitit për Skënderbeun. Temitope është i vetëdijshëm për diçka të tillë, por nuk do të shohë aq larg. Për të e rëndësishme mbetet fitorja në ndeshjen e radhës e mbi të gjitha rikuperimi fizik pas dëmtimit në fitoren ndaj Turbinës.

“Dy fitore do të ishin qershia mbi tortë e Skënderbeut dhe normalisht kush nuk do t’i donte dy fitore. Por nuk duhet të shkojmë menjëherë aq larg, le ta nisim me hapa të vegjël. Të mendojmë për ndeshjen e radhës dhe të bëjmë maksimumin që të dalim me tri pikët nga transferta e radhës. Personalisht jam duke menduar për rikuperimin tim. Sakrifikova që hyra në lojë ndeshjen e së dielës, pasi kisha një shqetësim në kofshë.

Për fat të mirë mbyllëm ndeshjen shpejt, madje dhe arrita të shënoja. Më pas ndjeva lodhje të muskulit të dëmtuar dhe vendosa të dal për të mos e keqësuar më shumë lëndimin. Sot do të shoh se në çfarë faze është lëndimi dhe sa ditë do të duhen për rikuperimin e plotë. Shpresoj që të jetë diçka momentale dhe të mos na kërkojë shumë kohë për të mos humbur ndeshjen e radhës”, e mbylli prononcimin e tij Temitope, autor i pesë golave me Skënderbeun në këtë sezon.





Lajmet e fundit nga