Nga Olivie me Ualidin te shokët e xhamisë, sa të njohur në fushë gjatë Francë-Marok

2022-12-14 19:50:40, Sport CNA

Jo vetëm Mbape dhe Hakimi. Në këtë gjysmëfinale të papritur të Botërorit do të kryqëzohen shumë rrugë dhe sfida, mes miqësive dhe frekuentimeve të çdo lloji, që mbërrijnë deri në vitin 2008 kur Olivie Zhiru kryqëzoi rrugën me trajnerin maroken Ualid Regragui te Grënoblë gjatë një faze përgatitore.

Dhe ishin në rrugë të ndryshme. Sulmuesi i Milanit ishte në fillim të karrierës së tij të pafundme. Regragui, i cili është ulur në stolin e Marokut vetëm prej muajit gusht, kishte fituar tituj radhazi. Por sot do të jenë të shumta shkeljet e syrit përpara nisjes së ndeshjes.

SHPRESA – Katërmbëdhjetë vite më parë, Zhiru u kthye te Grënoblë, e cila e kishte kompletuar formacionin, duke shpresuar se ai do të rrëmbente një vend në skuadrën e parë e sapongjitur në Ligën 1. Ishte një verë e veçantë, e ndarë me Regraguin gjatë një grumbullimi në Vitel, me shumë miqësore: luajti një pjesë me Metzin, që përfundoi 2-2 dhe me gol të francezit. Por nuk ishte e mjaftueshme për të bindur trajnerin Bazdareviç. Zhiru u largua te Turs në Ligën 2, duke u shpallur golashënuesi më i mirë i kampionatit në 2009-’10 me 21 gola dhe pastaj vetëm ngjiti shkallë në karrierë. Regragui mbeti te Grënoblë për të shoqëruar kolegët në elitën franceze nga ku u largua disa vite më vonë për ta mbyllur me amatorët.

NË XHAMI – Sulmuesi francez do të gjejë Zijehun, i cili i bëri gati valixhet nga Çelsi për te Milani në verën e 2021-shit. Grizman do të gjejë portierin Bonu, të cilin e njohu tek Atletiko e Madridit në 2014. Dhe si ai Kunde, me të cilin ka ndarë dhomat e zhveshjes te Sevilja, përpara se të transferohej te Barcelona. Në Katalonjë ka nisur edhe miqësia mes Dembelesë dhe 20-vjeçarit Abde Ezalzuli, i cili sot luan tek Osasuna. Sipas “L’Equipe”, ata vizitojnë edhe të njëjtën xhami.

SEKRETET- Regraguit mund t’i zbulojë ndonjë sekret mbrojtësi i majtë i Bajernit, Mazraui, i cili njeh pikat e forta dhe të dobëta të Upamekanos, Komanit dhe Pavarit, një ish-koleg i Bufalit te Lila. Por informacione për Deshampin mund të sigurojë edhe Fofana, i cili te Strasburgu punoi pranë me Ounahin. Ndërsa Kamavinga, përpara se të transferohej te Reali, luante te Ren me Aguerd. Sot qendërmbrojtësi i Uest Hemit do të përqafojë kolegun Alfons Areolën, portieri i tretë i Francës.