SHBA, paralajmërim mbi përpjekjet e vendeve të huaja për të ndikuar votuesit amerikanë

2022-10-04 09:20:23, Kosova & Bota CNA

SHBA, paralajmërim mbi përpjekjet e vendeve të huaja për

Zyrtarët amerikanë thonë se Rusia po punon për të përforcuar dyshimet në lidhje me integritetin e zgjedhjeve amerikane, ndërsa Kina është e interesuar të ndikojë në perspektivat e politikave në favor të Pekinit.

Ky shqetësim përputhet me një raport jo sekret të shërbimeve amerikane të zbulimit të siguruar nga agjencia e lajmeve Associated Press që thotë se Kina ndoshta po kërkon të ndikojë në gara të caktuara zgjedhore për të "penguar kandidatët që perceptohen si kundërshtarë të Pekinit".

Raporti thotë se Pekini sheh një rrezik më të ulët nga ndërhyrja në zgjedhjet për Kongresin, që nuk përkojnë me ato presidenciale, se sa në zgjedhjet presidenciale në Shtetet e Bashkuara.

Vendet e huaja prej kohësh janë përpjekur të ndryshojnë opinionin publik në Amerikë, ndoshta në mënyrë më të qartë kjo është demonstruar gjatë një ndërhyrje të fshehtë ruse përmes fushatave në mediat sociale për të shkaktuara përçarje në zgjedhjet presidenciale të vitit 2016. Qeveria e Shteteve të Bashkuara ka qenë një një nivel të lartë alarami që nga ajo kohë, duke paralajmëruar vazhdimisht rreth përpjekjeve nga Rusia, Kina dhe Irani për ndërhyrje në politikën amerikane dhe për të ndikuar mendimet e votuesve.

“Mjedisi aktual është shumë kompleks, ndoshta më kompleks sesa në vitin 2020”, tha të hënën për gazetarët Jen Easterly, drejtore e Departamentit të Sigurisë Kombëtare për sigurinë kibernetike.

Rusia po intensifikon përpjekjet për të ushtruar ndikimin e saj në temat përçarëse në internet, përfshirë përhapjen e dyshimeve rreth integritetit të zgjedhjeve amerikane, por pa krijuar përmbajtje të vetë, tha të hënën për gazetarët një zyrtar i lartë i FBI-së, i cili foli në kushte anonimiteti.

Sipas tij, në përgjithësi, përpjekjet e Kinës janë të përqëndruara më shumë në formimin e perspektivave mbi politikat, përfshirë ato në nivel shtetëror dhe lokal, në vend të shpenzimit të energjisë në rezultatin përfundimtar të zgjedhjeve.

Raporti i botuar të hënën vjenë disa javë pasi Departamenti i Sigurisë Kombëtare shpërndau një raport që e përshkruante qasjen e Kinës ndaj zgjedhjeve të këtij viti për Kongresin si të ndryshëm nga ai i vitit 2020, kur agjencitë amerikane të zbulimit vlerësuan se Kina kishte shqyrtuar mundësinë e përdorimit të mjeteve të saj për të ndikuar zgjedhjet presidenciale por në fund nuk e kishte bërë këtë.

Zyrtarët kinezë dhe rusë dhe mediat shtetërore në Kinë e Rusi gjithmonë i kanë mohuar akuzat për ndërhyrje në zgjedhjet amerikane, duke thënë se Amerika është ajo që po ndikon mbi vendet e tjera.

Zyrtarët amerikanë thonë se nuk kanë identifikuar ndonjë kërcënim të besueshëm ndaj infrastrukturës zgjedhore, por paralajmërimi i agjencive të zbulimit vjen në kulmin e fushatës së zgjedhjeve të nëntorit për Kongresin, ku një numër në rritje i kandidatëve dhe votuesve po shprehin hapur mungesën e besimit në proceset demokratike të vendit./VOA