31% e ekonomisë shkon për t’u ushqyer/ Shqiptarët, rekord në Evropë me shpenzimet për bukë, mish, peshk, qumësht, fruta

3 Janar 2024, 09:16, Ekonomi CNA

31% e ekonomisë shkon për t’u ushqyer/ Shqiptarët, rekord

Familjet shqiptare janë aq të varfra sa detyrohen që pjesën më të madhe të të ardhurave të tyre t’i çojnë për t’u ushqyer.

Sipas Eurostat, shpenzimet nominale për ushqime (të matura sipas standardit të fuqisë blerëse), në Shqipëri ishin sa 31% e Prodhimit të Brendshëm Bruto (PBB), ose asaj që prodhon ekonomia në një vit, në 2022. Kjo shifër është më e larta në Evropë dhe shumë më tepër sesa mesatarja prej 6.3% e PBB-së së Bashkimit Evropian.

Pas Shqipërisë në vend të dytë është Mali i Zi, me 22.7% të PBB-së, e ndjekur nga Bosnjë dhe Hercegovina (20.7%), Maqedonia e Veriut (20.6) dhe më e ulëta është në Serbi, me 14.5% të PBB-së (të dhënat për Kosovën mungojnë).

Çmimet e ushqimeve në Shqipëri janë sa 83.7% e mesatares së Bashkimit Evropian, e treta më e shtrenjtë në rajon, pas Serbisë (89.7) dhe Malit të Zi (85.8%). Më të lirat në rajon janë çmimet në Maqedoninë e Veriut, me 68.2% e mesatares së BE-së.

Për bukë e drithëra, në Shqipëri shpenzohet 4.3% e PBB-së, nga 1.1% që është mesatarja evropiane. I dyti pas nesh është Mali i Zi me 3.4% të PBB-së.

Për qumësht, djathë dhe vezë, shpenzimet janë sërish rekord në 5.1% të PBB-së, nga vetëm 1% që është mesatarja e BE-së. Familjet shqiptare i blejnë këto produkte 11.8% më shtrenjtë sesa mesatarja evropiane, ndër më të shtrenjtat në Evropë, ndonëse jemi një vend ku bujqësia sjell rreth 20% të ekonomisë.

Shpenzimet rekord janë dhe për vajra e yndyra, në 1.5% të PB-së, nga 0.2% që është mesatarja evropiane, ndërkohë që këto produkte blihen gati 9% më shumë sesa mesatarja evropiane.

Për fruta e perime shpenzohet 11.8% e PBB-së, sërish më e larta në Evropë, nga 1.4% që është mesatarja evropiane. I dyti pas nesh është Bosnjë Hercegovina me 7.1% të PBB-së. Frutat e perimet kushtojnë sa 72% e mesatares evropiane.

Edhe për mishin, Shqipëria kryeson, me shpenzime që arrijnë në 6% të PBB-së, nga 1.4% që është mesatarja e BE-së. Mishi kushton sa 73% e mesatares së Bashkimit Evropian.

Për peshkun shpenzimet janë sa 1.1% e PBB-së, nga 0.4% mesatarja e BE-së. Peshku kushton sa 81% e mesatares evropiane. Ndonëse Shqipëria është një vend bregdetar, në Maqedoninë e Veriut mund ta gjesh peshkun më lirë, sa 68.5% e mesatares së BE-së, sipas Eurostat./ Revista Monitor